Kreu i Partisë së Re Demokratike Kanadeze (NDP) Jagmeet Singh ka bërë thirrje që presidentit amerikan Donald Trump t’i ndalohet hyrja në Kanada për Samitin e G7-ës, duke përmendur dënimin e tij penal dhe kërcënimet e perceptuara ndaj stabilitetit global, shkruan Times of India.
Singh i bëri komentet të mërkurën gjatë një fjalimi në Këshillin e Montrealit për Marrëdhëniet me Jashtë, përpara Samitit të G7-ës të planifikuar për 15-17 qershor në Alberta.
“Unë gjithashtu besoj se duhet të ndalojmë Donald Trump të marrë pjesë në Samitin e G7. Donald Trump nuk duhet të jetë i mirëpritur këtu”, tha Singh.
“Pse do të lejojmë një kriminel të dënuar në vendin tonë?”
Singh shkoi më tej, duke e etiketuar Trumpin një “fashist” dhe duke kritikuar veprimet e tij gjatë presidencës së tij të dytë, përfshirë shkurtimet e ndihmës ndërkombëtare, tërheqjen nga Organizata Botërore e Shëndetësisë dhe Marrëveshja e Parisit për Klimën.
“Pse do të ftojmë dikë që ka kërcënuar vetë demokracinë tonë, vetë sovranitetin tonë? Pse do të ftojmë dikë që ka kërcënuar mirëqenien tonë ekonomike, që kërcënon aleatët tanë dhe kërcënon stabilitetin e botës?” pyeti Singh.
Samiti i G7 do të mbahet në rajonin Kananaskis, rreth 100 kilometra në perëndim të Calgary. Qeveria kanadeze nuk i ka komentuar komentet e Singh ose nëse Trump do ndalohet të marrë pjesë.
