Kryeministri Rama iu përgjigj një komentuesi që e pyeti nëse mund të kalonte dot oqeanin, një referencë për pyetjen që kreu i qeverisë i bëri kreut të PD-së Berisha para se ky i fundit të shpallej non-grata.
Ai tha se jo vetëm e kalon oqeanin sa herë të dojë por do ketë një surprizë për Berishën dhe qytetarët.
“Unë me oeqanin s’kam pas asnjëherë probleme dhe e kaloj sa herë të dua. Megjithatë mos u çudit fare kur të shohesh që jo vetëm do e kaloj, po do ia lëmë kohës dhe do iu bëj një surprizë ty dhe kënetës. Eh ç’na gjeti, a e kalon dot oqeanin thotë.” – tha Rama nga panairi i turizmit në kryeqytetin gjerman Berlin.
Ai tha më tej se Shqipëria duhet të ketë oferta të përbashkëta turistike me Kosovën dhe tani që zgjedhjet kanë përfunduar në Kosovë kjo duhet të ndodhë dhe se Shqipëria e Kosova duhet të jenë bashkë edhe me mendje, se me zemër janë përherë.
