Kina ka vendosur tarifa të reja kundër importeve bujqësore nga SHBA, në përgjigje të masave të fundit të administratës Trump, por njëkohësisht lë të hapur mundësinë për negociata.
“Kina do të luftojë deri në fund çdo luftë tregtare,” deklaroi zëdhënësi i Ministrisë së Jashtme kineze, pas vendosjes së tarifave hakmarrëse për produkte amerikane si mishi i viçit, derrit, soja dhe pula, të cilat do të përballen me një tarifë shtesë prej 10-15% duke filluar nga 10 marsi.
Ky veprim vjen menjëherë pas hyrjes në fuqi të një tarife 10% nga SHBA ndaj mallrave kineze, të cilat i shtohen masave të vendosura gjatë mandatit të parë të Trump dhe atyre të shpallura muajin e kaluar.
Goditje ndaj bazës elektorale të Trump
Kina ka zgjedhur të godasë fermerët amerikanë, të cilët janë ndër mbështetësit kryesorë të Trump. 78% e zonave rurale që varen nga bujqësia votuan për Trump në 2024 dhe Kina është një nga blerësit më të mëdhenj të produkteve të tyre.
Ekspertët thonë se këto masa do të krijojnë presion mbi çmimet e produkteve bujqësore në SHBA dhe mund të detyrojnë administratën amerikane të negociojë.
“Ka furnizime të mjaftueshme të sojës dhe misrit në tregjet globale për Kinën të ndryshojë furnitorin, por për SHBA do të jetë problem,” tha analisti Ole Houe përcjell BBC.
Pekini: “Jemi gati për bisedime, por jo për shantazhe”
Ndryshe nga përshkallëzimi i luftës tregtare në 2018, këtë herë Pekini ka zgjedhur një qasje më të kujdesshme. Tarifat e reja kineze mbeten nën nivelin 20%, ndërsa në të kaluarën kishte vendosur tarifa deri në 25% për sojën amerikane.
Zëdhënësi i Ministrisë së Jashtme, Lin Jian, theksoi se Kina nuk do të pranojë presion apo shantazhe, por është e gatshme për dialog.
Në shkurt, u përfol një bisedë telefonike mes Presidentit Trump dhe homologut të tij kinez, Xi Jinping, por ajo nuk u realizua. Ndërkohë, Pekini nuk ka ndërmarrë hapa për të goditur fluksin e fentanilit, një shqetësim kryesor i Uashingtonit, duke riafirmuar se ky është një problem i SHBA.
Ekonomia kineze përballet me sfida
Tarifat e reja pritet të kenë një ndikim të ndjeshëm në ekonominë kineze, e cila tashmë po përballet me ngadalësim të rritjes, ulje të çmimeve të pasurive të paluajtshme dhe papunësi të lartë tek të rinjtë.
Këtë javë, mijëra delegatë janë mbledhur në Pekin për një seancë të rëndësishme parlamentare, ku fokusi kryesor është stabiliteti ekonomik.
Në të njëjtën kohë, Kina po kërkon të forcojë lidhjet me partnerë të tjerë globalë si një kundërpërgjigje ndaj politikave të Trump, duke e paraqitur Uashingtonin si një aktor që po dëmton jo vetëm Kinën, por edhe aleatët e tij.
“SHBA po sillet si një ngacmues,” shkruan media shtetërore Xinhua, duke publikuar satiro kundër tarifave të vendosura ndaj aleatëve dhe fqinjëve të Amerikës.
Në këtë klimë të tensionuar, pritet që përplasja tregtare SHBA-Kinë të ndikojë jo vetëm në marrëdhëniet bilaterale, por edhe në ekonominë globale.
