Real Madridi doli fitimtar në ndeshjen e parë të 1/8 së finales ndaj Atletico Madridit.
“Los Blancos” të drejtuar nga Carlo Ancelotti morën një fitore të madhe ndaj rivalit të qytetit.
Reali triumfoi 2-1, një rezultat që e dërgon më të qetë skuadrën në ndeshjen e dytë të kësaj përballje.
Serinë e golave e hapi Rodrygo, që shënoi një gol të bukur pas një asistimi perfekt nga Fede Valverde.
Rodrygos iu kundërpërgjigj Julian Alvarez me një gol të jashtëzakonshëm për 1-1.
Pjesa e parë u mbyll me këtë rezultat, derisa ajo e dyta ishte e tëra e Real Madridit.
Madrilenët e bardhë gjetën golin e fitores me anë të Brahim Diazit.
Reali pati edhe disa mundësi të mira shënimi, por që nuk arritën t’i konkretizojnë.
Ndeshja e kthimit luhet më 12 mars në “Civitas Metropolitano”.
Në sfidën tjetër Arsenali e ka thuajse të sigurt kualifikimin në çerekfinale të Ligës së Kampionëve.
Të martën mbrëma në Eindhoven të Holandës, skuadra londineze fitoi 7:1 ndaj PSV-së në ndeshjen e parë të një të tetës së finales në Champions.
Arsenali dominoi plotësisht për fitoren bindëse, ndërsa ndeshja e kthimit që zhvillohet më 12 mars në “Emirates” pritet të jetë më shumë formalitet.
Jurrien Timber në minutën e 18-të, Ethan Nëaneri në minutën e 21-të dhe Mikel Merino në minutën e 31-të shënuan në pjesën e parë për skuadrën e Mikel Artetas.
Noa Lang realizoi penallti në minutën e 43-të për vendasit.
Martin Odegaard shënoi dy gola në pjesën e dytë, në minutën e 47-të e 73-të. Gol tjetër për Arsenalin realizoi Leandro Trossard në minutën e 48-të, kurse për 7:1 realizoi Riccardo Calafiori në minutën e 85-të.
Sfida mes Dortmund dhe Lille përfundoi pa fitues me skuadrat që e mbyllën në barazim 1-1.
Karim Adeyem shënoi për epërsinë 1:0 të Dortmundit, finalistit të edicionit të kaluar. Rezultatin në 1:1 e barazoi Hakon Arnar Haraldsson në minutën e 68-të.
