Një makinë përplasi një turmë në qytetin perëndimor të Gjermanisë Mannheim të hënën, duke vrarë të paktën dy persona dhe duke plagosur 11 të tjerë, duke lënë në hije festimet e karnavaleve në rajonin ku policia kishte qenë në gatishmëri për sulme.
Policia ndaloi shoferin, i cili dukej se ishte përplasur qëllimisht në turmë, duke pasur parasysh shpejtësinë me të cilën po ngiste, thanë prokurorët kurse ministrja e Brendshme Nancy Faeser e cilësoi si “tmerr në mes të ditës” ngjarjen, shkruan Reuters.
Ai nuk dukej se ishte i motivuar politikisht apo fetarisht, por kishte arsye për të besuar se ai ishte psikologjikisht i sëmurë, tha kryeprokurori publik i Mannheimit, Romeo Schluessler.
Prokurorët kanë nisur procedurat hetimore kundër të dyshuarit, një gjerman 40-vjeçar nga shteti fqinj i Rheinland-Pfalz, për dy akuza për vrasje dhe akuza të shumta për tentativë vrasje.
I dyshuari nuk është marrë ende në pyetje pasi ai duhej t’i nënshtrohej trajtimit mjekësor pasi qëlloi veten në gojë me një pistoletë bosh pas sulmit.
Siguria ka qenë një shqetësim kryesor në Gjermani pas një serie sulmesh të dhunshme në javët e fundit, duke përfshirë përplasjet vdekjeprurëse të makinave në Magdeburg në dhjetor dhe në Mynih muajin e kaluar, si dhe një therje me thikë në Mannheim në maj 2024.
“Incidenti i sotëm, ashtu si aktet e tmerrshme të muajve të kaluar, shërben si një kujtesë e ashpër: ne duhet të bëjmë gjithçka që është e mundur për të parandaluar veprime të tilla”, tha udhëheqësi i mundshëm i ardhshëm i Gjermanisë, Friedrich Merz, konservatorët e të cilit fituan zgjedhjet kombëtare muajin e kaluar.
“Gjermania duhet të bëhet edhe një herë një vend i sigurt. Ne do punojmë me vendosmëri të plotë për ta arritur këtë.”
Dy të vdekurit ishin një grua 83-vjeçare dhe një burrë 54-vjeçar.
