Administrata Trump ka pezulluar përkohësisht aksesin e Ukrainës në imazhet satelitore komerciale të blera nga qeveria amerikane përmes kompanisë Maxar, sipas Agjencisë Kombëtare të Inteligjencës Gjeohapësinore dhe Maxar.
Ukraina e ka përdorur prej kohësh këtë imazh të lartë për të gjurmuar lëvizjet e trupave ruse, për të vlerësuar terrenin dhe për të ndihmuar në planifikimin e operacioneve ushtarake, përcjell CNN.
Lëvizja për të pezulluar aksesin e tyre në imazhet, të cilat janë marrë nga satelitët e Maxar dhe të blera nga NGA, pason vendimin e administratës Trump për të ndalur çdo ndarje të inteligjencës me ukrainasit që mund të përdoret për të sulmuar Rusinë.
“Maxar ka kontrata me qeverinë amerikane dhe dhjetëra vende aleate dhe partnere në mbarë botën për të ofruar imazhe satelitore dhe të dhëna të tjera gjeohapësinore. Secili klient merr vendimet e veta se si i përdor dhe si i shpërndan ato të dhëna”, tha zëdhënësi i Maxar.
“Ne i marrim shumë seriozisht angazhimet tona kontraktuale.” shtuan ata. “Nuk ka asnjë ndryshim në mënyrën se si ne mbështesim klientët tanë të tjerë dhe as programet apo kontratat e tyre.”
CNN raportoi të premten se ndërkohë që qeveria amerikane ka “zvogëluar” ndarjen e inteligjencës me Ukrainën që mund të përdoret për operacione sulmuese kundër Rusisë, SHBA-ja ende po ndan informacione të inteligjencës që Ukraina mund të përdorë për të mbrojtur veten.
