Presidenti amerikan Trump po shqyrton tërheqjen e trupave amerikane nga Gjermania dhe rivendosjen e tyre në Evropën Lindore, shkruan The Telegraph.
Trump po shqyrton tërheqjen e rreth 35,000 ushtarëve dhe personel mbështetës nga Gjermania, në një masë që do përkeqësonte më tej marrëdhëniet SHBA-Evropë.
Presidenti amerikan, i cili ka paralajmëruar vijimësisht se Evropa duhet të angazhohet më shumë për aftësitë e saj mbrojtëse, po bëhet gjithnjë e më i zemëruar që kontinenti “po shtyn për luftë me Rusinë”, thanë burime pranë administratës.
Rreth 160,000 personel janë të vendosur jashtë Shteteve të Bashkuara, një pjesë e madhe e të cilëve janë në Gjermani.
“Trump është i zemëruar që Evropa duket se po shtyn për luftë”, tha një burim i afërt me Shtëpinë e Bardhë.
Brian Hughes, një zëdhënës i sigurisë kombëtare të SHBA-së, tha: “Ushtria amerikane është gjithmonë duke shqyrtuar rishpërndarjen e trupave në mbarë botën për të trajtuar sa më mirë kërcënimet e tanishme ndaj interesave tona”
Telegraph shkruan se presidenti po shqyrton rishpërndarjen e trupave nga Gjermania në Hungari, e cila ka mbajtur një marrëdhënie të ngushtë me Rusinë.
Në një samit urgjent të BE-së në Bruksel të enjten, kryeministri hungarez Orban, vuri veton ndaj një zotimi për të forcuar mbështetjen për Ukrainën, i cili u nënshkrua nga të gjitha vendet e tjera anëtare.
Orbán ka mbajtur një marrëdhënie relativisht të ngushtë me Rusinë, duke kundërshtuar shpesh sanksionet e BE-së ndaj Moskës.
Trump thuhet se po shqyrton ripozicionimin e disa trupave amerikane në Evropë, në mënyrë që ato të përqendrohen rreth vendeve të NATO-s që kanë rritur shpenzimet e tyre të mbrojtjes për të përmbushur objektivat.
Është pjesë e planeve të administratës për të rishikuar përfshirjen e NATO-s në një mënyrë që favorizon vendet anëtare me shpenzime më të larta të mbrojtjes.
Trump ka kritikuar në mënyrë të përsëritur vendet e NATO-s për mospërmbushjen e objektivit të shpenzimeve prej dy për qind, duke argumentuar se pabarazia vendos një barrë të padrejtë për Shtetet e Bashkuara.
Të enjten, ai sugjeroi se SHBA-ja nuk mund të mbrojë aleatët e NATO-s që nuk i përmbushin objektivat shpenzimeve duke tronditur anëtarët e aleancës.
Gjatë mandatit të tij të parë, Trump urdhëroi tërheqjen e pothuajse 12,000 trupave nga Gjermania, ku SHBA kishte disa objekte të mëdha ushtarake, duke përfshirë bazën ajrore Ramstein, selinë e Komandës Evropiane të SHBA.
Por masa u ndalua nga Joe Biden mes kritikave të përhapura nga Kongresi.
VINI RE: Ky material është pronësi intelektuale e The Telegraph
Përgatiti për Hashtag.al, Klodian Manjani
