Grupet e armatosura dhe forcat e sigurisë të lidhura me sundimtarët e rinj islamistë të Sirisë kanë vrarë më shumë se 340 persona, përfshirë gra dhe fëmijë nga minoriteti alavit, në rajonin bregdetar të vendit që nga e enjtja, sipas kreut të një organizate monitoruese të luftës.
Reuters nuk ka mundur të verifikojë në mënyrë të pavarur këto raportime.
Rami Abdulrahman, kreu i Observatorit Sirian për të Drejtat e Njeriut, tha se vrasjet masive në Jableh, Baniyas dhe zonat përreth, në zemrën e territorit alavit të Sirisë, përbëjnë dhunën më të rëndë të regjistruar në vite në këtë konflikt civil 13-vjeçar.
Autoritetet e reja në pushtet nisën një operacion shtypës të enjten kundër asaj që e cilësuan si një kryengritje në formim, pas disa sulmeve vdekjeprurëse nga militantët e lidhur me ish-presidentin Bashar al-Assad.
Një zyrtar sirian i sigurisë deklaroi se disa dhjetëra pjesëtarë të forcave të sigurisë janë vrarë në përleshjet e ashpra me militantët.
Zyrtarët kanë pranuar se ka pasur shkelje gjatë operacionit, të cilat i kanë atribuar turmave të çorganizuar të civilëve dhe luftëtarëve që ose u përpoqën të ndihmonin forcat zyrtare të sigurisë ose kryen krime mes kaosit të luftimeve.
Një burim nga Ministria e Mbrojtjes tha të shtunën për mediat shtetërore se të gjitha rrugët që çojnë në bregdet janë bllokuar për të parandaluar shkeljet dhe për të rikthyer qetësinë, ndërsa forcat e sigurisë janë vendosur në rrugët e qyteteve bregdetare.
I njëjti burim shtoi se një komitet emergjent është krijuar për të monitoruar shkeljet dhe se kushdo që nuk i bindet urdhrave të komandës ushtarake do të përballet me një gjykatë ushtarake.
Përmasat e dhunës, përfshirë raportimet për ekzekutime masive të dhjetëra burrave alavitë në një fshat, shtrojnë më tej pikëpyetje mbi aftësinë e autoritetit të ri islamist për të qeverisur në mënyrë gjithëpërfshirëse, çështje kjo që është një shqetësim kryesor për kryeqytetet perëndimore dhe arabe.
Bashar al-Assad u rrëzua dhjetorin e kaluar pas dekadash sundimi dinastik nga familja e tij, i karakterizuar nga shtypje e ashpër dhe një luftë civile shkatërruese.
Presidenti i përkohshëm i Sirisë, Ahmed Sharaa, duke mbështetur operacionin shtypës në një fjalim televiziv të premten mbrëma, tha se forcat e sigurisë nuk duhet të lejojnë askënd të “përdorë masa të tepruara në reagim… sepse ajo që na dallon ne nga armiku ynë është angazhimi ynë ndaj vlerave tona.”
“Kur heqim dorë nga morali ynë, ne dhe armiku ynë përfundojmë në të njëjtën anë,” shtoi ai, duke theksuar se civilët dhe të burgosurit nuk duhet të keqtrajtohen.
