Pothuajse të gjitha aeroportet gjermane, përfshirë ato në qendrat kryesore të vendit në Frankfurt, Mynih dhe Berlin, përballen me ndërprerje të hënën pasi sindikata e punës Ver.di i bëri thirrje personelit tokësor, mbajtësve të bagazheve dhe stafit të sigurisë për të hyrë në një grevë njëditore, shkruan Bloomberg.
Priten kufizime të mëdha për nisjet dhe mbërritjet, përfshirë anulimet e përhapura të fluturimeve. Në përgjithësi, grevat do fillojnë të dielën në mbrëmje dhe do përfundojnë 24 orë më vonë, tha sindikata në një deklaratë të dielën. Aeroporti i Hamburgut është tashmë i mbyllur për shkak të grevës, sipas faqes së tij të internetit.
“Grevat po ndërpresin një vend të tërë nga trafiku ajror,” tha Ralph Beisel, drejtor menaxhues i shoqatës së aeroportit ADV.
“I bëjmë thirrje Ver.di-t të marrë në konsideratë interesat e pasagjerëve dhe të kërkojë një zgjidhje miqësore në tryezën e bisedimeve.”
Sindikata, e cila përfaqëson rreth 2 milionë punëtorë, javën e kaluar shprehu mbështetje për planet gjithëpërfshirëse të reformës fiskale nga kancelari në pritje i Gjermanisë, Friedrich Merz, duke thënë se kjo do ndihmonte në modernizimin e infrastrukturës së shkatërruar të vendit. Ekonomia më e madhe e Evropës ka planifikuar investime të financuara nga borxhi prej 500 miliardë euro gjatë 10 viteve dhe planifikon të rrisë shpenzimet e mbrojtjes në një shkallë të madhe.
Kërkesat e sindikatës përfshijnë paga më të larta, më shumë ditë pushimi dhe kufizime në kontratat e përkohshme.
“Me grevat e tyre paralajmëruese të hënën, punonjësit do tregojnë se janë seriozë për përmirësimin e kushteve të tyre të punës”, tha në deklaratë Wolfgang Pieper, kryenegociatori i Ver.di.
