Kryeministri i ri i Kanadasë, Mark Carney, tha të martën se qeveria e tij do të mbajë në fuqi tarifat ndaj Shteteve të Bashkuara derisa amerikanët të tregojnë respekt dhe të angazhohen për tregti të lirë, pas kërcënimeve të presidentit të SHBA-së, Donald Trump, për dëme të mëdha financiare ndaj Kanadasë, përcjell Associated Press.
Carney, i cili do të betohet si pasues i Justin Trudeau në ditët e ardhshme, e quajti vendimin e Trump për tarifat e reja një sulm ndaj punëtorëve, familjeve dhe bizneseve kanadeze.
“Qeveria ime do të sigurojë që përgjigja jonë të ketë ndikim maksimal në SHBA dhe ndikim minimal këtu në Kanada, duke mbështetur punëtorët e prekur,” tha Carney.
“Qeveria ime do të mbajë tarifat tona derisa amerikanët të na tregojnë respekt dhe të bëjnë angazhime të besueshme dhe të drejta për tregtinë e lirë,” shtoi ai.
Trump njoftoi të martën se do të dyfishojë tarifat për çelikun dhe aluminin nga 25% në 50% për Kanadanë, duke përshkallëzuar luftën tregtare me fqinjën e veriut.
Trump tha në rrjetet sociale se rritja e tarifave, që do të hyjë në fuqi të mërkurën, është një përgjigje ndaj rritjes së çmimeve të energjisë elektrike që qeveria provinciale e Ontarios i ka vendosur energjisë së shitur në Shtetet e Bashkuara.
Presidenti amerikan e dënoi përdorimin e energjisë elektrike si një “mjet shantazhi dhe kërcënimi” dhe paralajmëroi se Kanadaja “do të paguajë një çmim financiar aq të madh sa do të shkruhet në librat e historisë për shumë vite.”
Trump vazhdoi të sugjerojë që Kanadaja duhet të bëhet pjesë e Shteteve të Bashkuara, gjë që ka shkaktuar zemërim mes kanadezëve.
“E vetmja gjë që ka kuptim është që Kanadaja të bëhet shteti ynë i pesëdhjetë e një,” shkroi Trump të martën. “Kjo do të eliminonte të gjitha tarifat dhe gjithçka tjetër.”
Zyrtarët kanadezë po planifikojnë vendosjen e tarifave hakmarrëse ndaj SHBA-së, të cilat pritet të shpallen të mërkurën.
Carney iu referua tarifave hakmarrëse fillestare të Kanadasë me vlerë 30 miliardë dollarë kanadezë (rreth 21 miliardë dollarë amerikanë), të cilat përfshijnë produkte si lëngu i portokallit, gjalpi i kikirikut, kafeja, pajisjet elektroshtëpiake, këpucët, produktet kozmetike, motorët dhe disa produkte letre.
Kryeministri i Ontarios, Doug Ford, i cili u përgjigj ndaj Trump duke rritur çmimet e energjisë elektrike, tha të martën në MSNBC se qytetarët dhe bizneset amerikane duhet të ngrihen kundër “kaosit” që po shkakton lufta tregtare e Trump.
“Nëse hyjmë në një recesion, do të jetë i shkaktuar nga një njeri i vetëm. Quhet recesioni i Presidentit Trump,” tha Ford. “Nuk duhet të jetë kështu. Të dy vendet duhet të jenë në lulëzim.”
Ndërkohë, lideri i opozitës konservatore në Kanada, Pierre Poilievre, e quajti lëvizjen e Trump një “tradhti tjetër” ndaj miqësisë së gjatë mes dy vendeve dhe kërkoi tarifa hakmarrëse.
“Nëse Presidenti Trump vendos tarifa 50% mbi çelikun dhe aluminin tonë, atëherë Kanadaja duhet të përgjigjet me tarifa 50% për të gjitha importet e çelikut dhe aluminit nga SHBA,” tha Poilievre.
“Mesazhi ynë për administratën amerikane duhet të jetë i qartë: mos e merrni për dobësi mirësinë tonë, ne jemi një vend i fortë, krenar dhe sovran dhe do të luftojmë kundër këtyre sulmeve ndaj ekonomisë dhe punëtorëve tanë.”
