Ukraina ka deklaruar se është e gatshme të pranojë një armëpushim të propozuar 30-ditor me Rusinë, pasi SHBA njoftoi se do të rifillojë dërgesat e armëve për Kievin, përcjell The Telegraph.
Pas bisedimeve mes Ukrainës dhe SHBA-së të martën, të dy vendet lëshuan një deklaratë të përbashkët, ku thuhet se Shtëpia e Bardhë do të “heqë menjëherë pezullimin e ndarjes së inteligjencës dhe do të rifillojë ndihmën e sigurisë për Ukrainën”.
Deklarata shtoi gjithashtu se Kievi kishte “shprehur gatishmërinë për të pranuar propozimin e SHBA-së për një armëpushim të menjëhershëm dhe të përkohshëm 30-ditor, i cili mund të zgjatet me marrëveshje të ndërsjellë mes palëve dhe që është i varur nga pranimi dhe zbatimi i njëkohshëm nga Federata Ruse”.
“Shtetet e Bashkuara do t’i komunikojnë Rusisë se reciprociteti rus është çelësi për arritjen e paqes.”
Presidenti i Ukrainës, Volodymyr Zelensky, konfirmoi gjithashtu se kishte pranuar propozimin e SHBA-së për një armëpushim të plotë 30-ditor.
Ai tha se delegacioni ukrainas kishte propozuar “heshtje në qiell – pa raketa, bomba, dronë me rreze të gjatë, dhe heshtje në det”, por Uashingtoni kishte sugjeruar që armëpushimi të shtrihej në “të gjithë vijën e frontit”.
“Ukraina e pranon këtë propozim, e konsiderojmë pozitiv dhe jemi të gatshëm të ndërmarrim një hap të tillë. Shtetet e Bashkuara të Amerikës duhet të bindin Rusinë për ta pranuar këtë,” shtoi Zelensky.
Të martën, zyrtarë të lartë, përfshirë Marco Rubio, sekretarin e shtetit të SHBA-së, Mike Waltz, këshilltarin për sigurinë kombëtare të Donald Trump, dhe Andriy Yermak, shefin e stafit të Zelensky-t, u takuan për më shumë se tetë orë në Arabinë Saudite.
Pas bisedimeve, Rubio tha se ata do t’ia përcillnin ofertën Moskës dhe se “topi tani është në fushën e Rusisë”.
Zelensky gjithashtu falënderoi Trump për “qëndrimin konstruktiv në bisedimet mes ekipeve tona”.
Marrëveshja e mundshme për armëpushim vjen pasi Ukraina ndërmori sulmin e saj më të madh ndonjëherë me dronë ndaj Rusisë të hënën në mbrëmje, duke vrarë të paktën tre persona dhe duke shkaktuar dëme të mëdha në ndërtesa banimi dhe makina në Moskë.
