Kryeministri Rama u tha socialistëve të Kavajës e Vorës se mundësia për integrimin e Shqipërisë në BE tani është më pranë se kurrë dhe për këtë vota e 11 majit është tejet e rëndësishme.
Ai u kërkoi votën shqiptarëve duke u bërë thirrje që të mos shohin partitë dhe bindjen politike po të vendosin për të ecur përpara me reformat dhe integrimin.
“Sot janë krijuar kushtet që ne të hymë realisht në BE, si rrjedhojë e përputhjes së rrethanave tona të brendshme me rrethanat e BE. Për herë të parë mundësia për t’u bërë pjesë e BE është reale. Kemi një kalendar për negociatat që është kalendari më i shpejtë në historinë e integrimit në BE. Nëse i mbyllim negociatat deri në 2027, të futemi dhe të bëhemi pjesë e BE. Ajo mundësi mund të ikë që aty, sepse ne kemi qenë gati për të hapur negociatat më para, por nuk ishin ata gati. Sot e kemi kalendarin në tavolinë të miratuar, na kanë thënë mbyllini negociatat në 2027 dhe ne do u marrim brenda në shtëpi. Kjo është diçka shumë e madh për t’u humbur ose vënë në diskutim nga vogëlsira të tipit jam me këtë parti, ose me atë parti, ose për Kavajën nuk është bërë kjo, po është bërë ajo. Ose shiko se kam inat me këtë, se ky s’më ka vlerësuar. Bëhet fjalë për Shqipërinë, për të gjithë, bëhet fjalë për të marrë një pasaportë të re”, tha Rama.
