Kryetari i PD-së, Sali Berisha, ka bërë thirrje nga Elbasani për të mos votuar kandidatët e opozitës që nuk iu bashkuan koalicionit. Ai përmendi rastin e deputetit Dashnor Sula, i cili dha dorëheqjen nga PD për t’u bashkuar me koalicionin “Nisma-Shqipëria bëhet”, duke theksuar se ai ka kohë për të rishikuar zgjedhjen e tij.
Berisha shtoi se votat për ata që nuk iu bashkuan aleancës janë vota për Edi Ramën dhe theksoi se programi i PD-së është më i miri për Shqipërinë.
“Dashnor Sula bëri zgjedhjen e tij, midis betejës në sheshin e burrave zgjodhi Tikun dhe iku në punën e tij, ka kohë ta mendojë”, tha Berisha.
“Do t’u them qytetarëve, asnjë votë për patericat e Edi Ramës, sepse ata u ftuan botërisht, pavarësisht nga mendimet e ndryshme, nëse e ndjeni veten opozitarë, bashkohuni me ne në aleancë.
Mirëpo ata nuk i lejuan problemet e tyre ndaj dhe votat për ta janë vota për Edi Ramën, de facto. Përveç kësaj, ne kemi programin më të shkëlqyer, programin e Shqipërisë Madhështore, një program që Shqipëria nuk e ka pasur kurrë më parë, por që u garantoj se do jetë realitet i padiskutueshëm.
Tani, të them të vërtetën, kemi edhe kryemagjistarin, bashkëkryestrategun e fitores më të madhe në historinë e njerëzimit, siç ishte rikthimi i Donald Trump në Shtëpinë e Bardhë me datën 20 janar. Chris LaCivita është një fuqi natyrore elektorale në vetvete”, tha kreu i PD.
