Komisionerja Europiane për Zgjerimin, Marta Kos e cila ndodhet për herë të parë në një vizitë në vendin tonë, iu bashkua festimeve të Ditës së Verës. Marta Kos ishte në Elbasan, ‘epiqendra’ e festës.
Në një prononcim të shkurtër për mediat, Kos foli edhe për integrimin e Shqipërisë, duke thënë se tashmë vendi ynë duhet të plotësojë detyrat deri në fund të 2027.
Kos vendosi edhe veroren e kësaj dite, duke thënë se shpreson që të sjellë fat për njerzit dhe rrugëtimin e vendit drejt BE-së.
“Shqipëria po bën një punë shumë të mirë, ka ende shumë reforma për t’u bërë por nëse bëhen, në fund të 2027 do të jetë edhe fundi i procesit. BE është shtëpia juaj, tani duhet të bëni detyrat, por së shpejti shpresoj që pas punës së bërë me pasion, BE të mos ketë 27 vende anëtare por 28. Kam dëgjuar se veroret sjellin fat, kam vënë dy sot, një për ju dhe një për BE, që të jenë fatsjellëse”, tha Kos.
“Në Elbasan takova gra të guximshme që po rindërtojnë jetën e tyre me mbështetje nga BE-ja. Në një punishte për tapicerinë, ato fitojnë aftësi dhe liri financiare. Fola me mbijetues të dhunës në familje që po kurojnë të kaluarën e tyre me ndihmën e BE-së. Ne qëndrojmë pranë tyre për komunitete më të sigurta dhe më gjithëpërfshirëse”, shkruan Kos.
