Lobistët e Huawei u ndaluan të hyjnë në ambientet e Parlamentit Evropian të premten, pas akuzave për ryshfet të lidhura me aktivitetet lobuese të kompanisë kineze në Dhomë.
“Parlamenti vendosi, si masë paraprake, të pezullojë hyrjen në Parlament të përfaqësuesve të atashuar me kompaninë Huawei me efekt të menjëhershëm”, tha një zëdhënës i Parlamentit për Euronews.
Ndalimi është i përkohshëm dhe do të mbetet në fuqi derisa autoritetet të përfundojnë hetimin e tyre. Ai lidhet me ambientet parlamentare në Bruksel, Strasburg, Luksemburg dhe në të gjitha zyrat ndërlidhëse në 27 vendet e BE-së.
Akuzat për korrupsion
Vendimi pasoi kontrollet e së enjtes të kryera nga Policia Federale në Rajonin e Kryeqytetit të Brukselit, si dhe në Flanders, Wallonia dhe gjithashtu në Portugali.
Disa individë janë arrestuar për t’u marrë në pyetje në lidhje me përfshirjen e tyre të dyshuar në korrupsion aktiv brenda Parlamentit Evropian, si dhe për falsifikim dhe përdorim të falsifikimeve, tha Zyra e Prokurorit Publik Federale.
Sipas hetimeve paraprake, praktika korruptive mund të kenë ndodhur rregullisht dhe në mënyrë diskrete që nga viti 2021, nën maskën e lobimit komercial dhe duke marrë forma të ndryshme: shpërblim për miratimin e posteve politike, dhurata të shtrenjta si ushqimi dhe shpenzimet e udhëtimit apo ftesa të rregullta për ndeshje futbolli.
Nëntë punonjës të Huawei janë të akredituar për të hyrë në ambientet e Parlamentit, sipas Regjistrit të Transparencës së BE-së.
