Kryeministri Edi Rama ka folur nga Elbasani për vendimin për mbylljen e aplikacionit TikTok në Shqipëri, duke theksuar se shumica e prindërve që e mbështesin këtë masë nuk janë socialistë, por përfshijnë edhe demokratë dhe qytetarë pa bindje politike.
Sipas tij, në takimet me prindërit, ai ka kuptuar se ata e shihnin këtë si një mundësi për të shpëtuar fëmijët e tyre nga ndikimi i dëmshëm i platformës.
“95% nuk janë socialistë. Shumë më tepër se 5% janë demokratë që kanë mbetur jetimë por që prapë nuk kanë ku shkojnë dhe rrinë pas kënetës, janë edhe të tjerë që nuk votojnë për ne. Sepse menduan si prindër, jo si demokratë dhe socialistë.
Më shihnin si mundësi që t’i shpëtoja nga ajo mortje që i ishte futur fëmijëve në trup. Më 11 maj duhet të vendosim për familjen dhe fëmijët.
Një prind që ka fëmijë s’duhet ta diskutojë fare që më 11 maj jo vetëm që të shkojë votim, por të investojë që ne të futemi në BE”, tha Rama.
