Komisioni Evropian ka miratuar një strategji të re për të orientuar kursimet e qytetarëve drejt investimeve produktive. Synimi është rritja e pjesëmarrjes së qytetarëve të BE-së në tregjet e kapitalit duke u ofruar atyre mundësi më të gjera investimi dhe duke përmirësuar edukimin financiar. Kjo pritet të forcojë pasurinë e tyre dhe të japë një shtysë të re për ekonominë e BE-së.
Rreth 70% e kursimeve të familjeve në BE – me vlerë rreth 10 trilionë euro – mbahen në formën e depozitave bankare. Këto depozita janë të sigurta dhe lehtësisht të aksesueshme, por zakonisht gjenerojnë më pak të ardhura krahasuar me investimet në tregjet e kapitalit. Strategjia e re synon të ndihmojë qytetarët e BE-së të rrisin pasurinë e tyre dhe të kursejnë në mënyrë më efikase për të ardhmen. Përmes krijimit të një blloku të unifikuar të kursimeve dhe investimeve, qytetarët që dëshirojnë të investojnë do të kenë më shumë mundësi për të hyrë në tregjet e kapitalit me akses të thjeshtë, të lirë dhe të përballueshëm ndaj një gamë të gjerë investimesh.
Investimet më të mëdha në tregjet e kapitalit do të ndihmojnë ekonominë, duke u dhënë mundësi kompanive të BE-së të rriten dhe të zhvillohen. Kjo mund të krijojë vende më të mira pune me paga më të larta dhe të nxisë investimet dhe rritjen në të gjitha sektorët ekonomikë.
Strategjia synon gjithashtu të forcojë integrimin dhe konkurrueshmërinë e sektorit bankar të BE-së, përfshirë thellimin e unionit bankar.
Për të realizuar këtë strategji, institucionet e BE-së, shtetet anëtare dhe aktorët kryesorë do të duhet të punojnë së bashku. Strategjia do të zhvillohet më tej, me masa konkrete që do të merren në fusha të veçanta për të rritur konkurrencën e ekonomisë së BE-së, duke u fokusuar fillimisht në masat me ndikimin më të madh në vitin 2025.
BE-ja duhet të shfrytëzojë plotësisht potencialin e saj për të arritur objektivat e saj të lidhura me konkurrueshmërinë, sigurinë dhe tranzicionin digjital dhe të gjelbër. Duke krijuar një sistem të integruar bankar dhe tregjesh kapitali, unioni i kursimeve dhe investimeve mund të mbyllë hendekun mes kursimeve dhe nevojave për investime.
