Shqipëria, Kosova dhe Kroacia nënshkruan të martën një deklaratë të përbashkët bashkëpunimi në fushën e mbrojtjes. Marrëveshja çoi në reagimin e menjëhershëm të Serbisë me Ministrinë e Jashtme serbe që tha të martën se do t’i dërgojë një kërkesë urgjente Shqipërisë dhe Kroacisë, duke kërkuar sqarime për një marrëveshje bashkëpunimi trepalësh të mbrojtjes me Kosovën.
Marrëveshja e nënshkruar në Tiranë ka në fokus forcimin e aftësive mbrojtëse, avancimin e teknologjisë ushtarake dhe përmirësimin e ndërveprueshmërisë rajonale nëpërmjet trajnimeve dhe stërvitjeve të përbashkëta.
Beogradi e kundërshtoi masën, duke argumentuar se Shqipëria dhe Kroacia, së bashku me “përfaqësuesin jolegjitim të institucioneve të përkohshme të vetëqeverisjes në Prishtinë”, kanë ndërmarrë hapa që prishin stabilitetin rajonal.
“Republika e Serbisë, si garantuese e paqes dhe asnjanësisë ushtarake në Ballkan, me të drejtë kërkon përgjigje për natyrën dhe qëllimet e këtij bashkëpunimi të sigurisë”, thuhet në deklaratën e Ministrisë së Jashtme të Serbisë.
Serbia paralajmëroi se krijimi i një aleance ushtarake pa u këshilluar me Beogradin është shqetësues, veçanërisht duke pasur parasysh përfshirjen e Kosovës, të cilën Serbia nuk e njeh si shtet të pavarur.
Deklarata përqendrohet në zhvillimin e kapaciteteve mbrojtëse, çuarjen para të industrisë dhe teknologjisë së mbrojtjes dhe përmirësimin e ndërveprimit ushtarak nëpërmjet edukimit, stërvitjes dhe veprimeve të përbashkëta. Duke folur në ceremoninë e nënshkrimit në Tiranë, ministri shqiptar i Mbrojtjes Pirro Vengu theksoi rëndësinë e këtij bashkëpunimi përballë sfidave të vijueshme të sigurisë.
“Në një mjedis të brishtë sigurie, ne ndajmë një vlerësim të përbashkët të kërcënimeve. Përkushtimi ynë për forcimin e aftësive mbrojtëse është më i fortë se kurrë,” tha ai.
Ministri kroat i mbrojtjes, Ivan Anusic dhe homologu i tij kosovar Ejup Maqedonci e përshkruan deklaratën si një hap të rëndësishëm drejt rritjes së sigurisë dhe stabilitetit rajonal, si dhe përmirësimit të kapaciteteve për të adresuar rreziqet dhe sfidat e përbashkëta.
Deklarata gjithashtu thekson përkushtimin e Shqipërisë dhe Kroacisë, të dyja shtete anëtare të NATO-s, për të mbështetur aspiratat e Kosovës për integrim të plotë në strukturat rajonale dhe euroatlantike.
Kryeministri i Kosovës, Albin Kurti e përshëndeti marrëveshjen, duke e cilësuar atë “një hap jashtëzakonisht të rëndësishëm për sigurinë dhe paqen në rajon”.
