Menjëherë pas Edi Ramës, kreu i Demokratëve Euroatlantikë, Lulzim Basha i është përgjigjur videos së kryeministrit duke vijuar kështu shkëmbimin e replikave të tyre.
Ndërkohë që Basha i dërgon video shpesh duke drejtuar makinën, Rama i përgjigjet nga sedilja e pasagjerit. Kjo gjë është evidentuar nga Basha duke e ironizuar dhe i përmendur sërish “shokët” që i ka në hetim ose të dënuar.
Ai më tej vijon me pyetjen për Ramën se ku i ka shokët, ata që firmosin për të, të cilët njëri pas tjetrit me radhë kanë mbushur 313-ën. Sipas Bashës, kësaj pune i bie ose kryeministri është më buf se bufi dhe ia vjedhin pas shpine, ose ai vet është kreu i bandës.
Në fund Basha ka dhe një porosi për Ramën, dy paketa, që do t’ia lej në emision tek Arjan Çani.
“O Rame, pasagjer ngele mor burr. Si s’të pash një herë në timon! Apo harrova, s’di me i dhënë ti. I japin të tjerët për ty, pastaj firifiu, i çon tek vendi ti apo jo? Ku i ke shokët më Ram, ku i ke ata që i vendosje në timon, ata që firmosnin për ty. Mirë një në burg, dy në burg, tre në burg, katër në burg, pesë në burg, gjashtë në burg, por u mbush 313 me shokët e tu mo Rame. Si i bie kësaj pune, o ti je më buf se bufi, t’i vjedhin shokët mbrapa shpine, ose ti je nona e kësaj pune, je kreu i bandës. E Rame, Rame, kom një porosi po ta lej te Çani, këto dy paketat” – thotë Basha.
