Kryebashkiaku i Tiranës Erion Veliaj ka qenë për rreth një orë e gjysmë në SPAK.
Sipas gazetares Klodiana Lala, Veliaj ka dhënë shpjegime lidhur me hetimet e nisura ndaj tij, ndërsa marrja në pyetje është bërë në prani të avokateve te tij Ermir Beta dhe Artur Selmani.
SPAK i ka komunikuar sot kryebashkiakut të Tiranës Erion Veliaj një akuzë të re, lidhur me futjen në ambientet e paraburgimit të sendeve të ndaluara.
Gazetarja Klodiana Lala raporton se akuza lidhet me faktin që Veliaj ka përdorur telefonin e një polici dhe ka bërë telefonata, gjatë kohës që e kanë shoqëruar për në ambientet e paraburgimit.
Kjo është hera e parë që kryebashkiaku i Tiranës merret në pyetje pas caktimit të masës së sigurisë arrest me burg nga gjykata dhe transferimit të tij në paraburgimin e Durrësit.
Kryebashkiaku i Tiranës akuzohet për “korrupsioni pasiv” dhe “pastrim parash”.
Dy ditë më parë ai ia delegoi punët e bashkisë Sara Goxhajt, një muaj pasi ia kishte besuar ato Anuela Ristanit.
Megjithatë mbrëmjen e djeshme ka ndërhyrë kryeministri Rama i cili ka shkuar në bashki dhe i ka kërkuar Protokollit që të mos protokollojë urdhrin e nxjerrë nga Veliaj për marrjen e detyrave të kryetarit të Bashkisë nga Sara Goxhaj, duke e larguar këtë të fundit nga pozicioni si dhe ka konfirmuar në detyrë Anuela Ristanin.
