Sulmues të dyshuar nga milicia e “Shtetit Islamik” në Saharanë e Madhe (ISGS) masakruan besimtarët në një xhami në jugperëndim të Nigerit, bëri të ditur Ministria e Brendshme e vendit të shtunën për DW.
Numri i viktimave nga sulmet terroriste është rritur ndjeshëm pas grushtit të shtetit të vitit 2023, kur vendi ndërpreu bashkëpunimin ushtarak me shumicën e ish-partnerëve të tij kundër terrorizmit.
Çfarë dihet për sulmin ndaj xhamisë në Niger?
“Rreth orës 14:00, ndërsa besimtarët myslimanë po kryenin faljen e së premtes, këta terroristë të armatosur rëndë rrethuan xhaminë dhe kryen një masakër me një mizori të rrallë,” thuhej në deklaratën e Ministrisë së Brendshme.
Sulmuesit gjithashtu i vunë zjarrin një tregu dhe disa shtëpive përpara se të tërhiqeshin.
Deri të shtunën, numri i viktimave kishte arritur në 44, ndërsa 13 persona të tjerë ishin plagosur, katër prej tyre në gjendje të rëndë.
Qeveria e përkohshme ushtarake e Nigerit shpalli tre ditë zie kombëtare në nder të viktimave. Mbi 99% e rreth 28 milionë banorëve të Nigerit janë myslimanë.
Dy ditë para sulmit në xhami, ushtria e Nigerit njoftoi se kishte vrarë 45 anëtarë të ISGS.
Pse po rriten sulmet?
Masakra ndodhi në Fambita, në rajonin jugperëndimor të Tillaberit, pranë kufirit me Malin dhe Burkina Fason – një zonë ku grupet terroriste islamiste kanë ngritur bastione të forta.
Edhe Mali dhe Burkina Faso kanë përjetuar grushte shteti që çuan në ndërprerjen e lidhjeve me aleatët perëndimorë, si Franca, në favor të Grupit Wagner të Rusisë, një kompani private ushtarake.
Ndërsa të tre vendet kanë premtuar forcimin e bashkëpunimit me një pakt të ri sigurie – duke formuar Aleancën e Shteteve të Sahelit – situata e sigurisë në rajon është përkeqësuar ndjeshëm që nga ardhja në pushtet e juntave ushtarake.
