Të paktën tre zjarrfikës dhe një punonjës i shërbimit publik u gjetën të vdekur në Korenë e Jugut, ndërsa më shumë se 20 zjarre pyjore përfshinë vendin të shtunën, raporton DW.
Zjarrfikësit po përpiqeshin të shuanin një zjarr në qarkun Sancheong, i cili filloi të premten dhe deri të shtunën në mbrëmje kishte djegur 500 hektarë (1,200 hektarë tokë).
Sancheong, që ndodhet në Provincën Jugore Gyeongsang, është rreth 250 kilometra (155 milje) në juglindje të Seulit.
Zyrtarët thanë se gati 1,600 zjarrfikës, 35 helikopterë dhe dhjetëra automjete u angazhuan për të luftuar zjarrin. Megjithatë, për shkak të terrenit malor dhe erërave të forta, vetëm 35% e zjarrit ishte vënë nën kontroll.
Më shumë se 200 banorë në 15 fshatra u urdhëruan të evakuohen.
Presidenti i përkohshëm i Koresë së Jugut, Choi Sang-mok, urdhëroi agjencitë përkatëse që “të mobilizojnë të gjitha pajisjet dhe personelin e disponueshëm për të shuar sa më shpejt zjarrin,” thuhet në një deklaratë të zyrës së tij.
Qeveria shpalli provincat Gyeongsang Veriore dhe Jugore, si dhe qytetin Ulsan, si zona katastrofike.
Shërbimi Pyjor i Koresë raportoi se disa rajone të tjera në provincat qendrore dhe jugore u prekën gjithashtu nga zjarret pyjore.
Agjencia lëshoi paralajmërime për zjarre në nivelin më të lartë, “kritike”, në 12 rajone, përfshirë provincat Gyeongsang Veriore dhe Jugore, si dhe qytetet Busan dhe Daejeon.
Zjarret gjithashtu detyruan mbylljen e disa seksioneve të autostradave në pjesën juglindore të vendit, përfshirë një segment që lidh qytetet Ulsan dhe Busan, qytetin e dytë më të madh në Korenë e Jugut.
