Të paktën 18 njerëz kanë vdekur ndërsa zjarret të shumta kanë shpërthyer në gjithë rajonin juglindor të Koresë së Jugut, me mijëra zjarrfikës të ndihmuar nga ushtria në një përpjekje për të kontrolluar një nga zjarret më të këqija të vendit në dekada.
Zjarret vdekjeprurëse janë përhapur me shpejtësi dhe kanë detyruar më shumë se 27,000 banorë të largohen nga shtëpitë e tyre, tha qeveria. Zjarret, të nxitura nga erërat e forta dhe moti i thatë, kanë rrafshuar lagje të tëra, kanë mbyllur shkolla dhe kanë detyruar autoritetet të transferojnë qindra të burgosur nga burgjet.
“Ne po vendosim gjithë personelin dhe pajisjet e disponueshme në përgjigje të zjarreve më të këqija ndonjëherë, por gjendja nuk është e mirë,” tha presidenti në detyrë Han Duck-soo, duke shtuar se ushtria amerikane në Kore po ndihmonte gjithashtu.
Që nga e mërkura në orën 5 të mëngjesit, 14 persona kishin vdekur në një zjarr që filloi në qarkun Uiseong, ndërsa katër vdekje të tjera ishin të lidhura me një tjetër zjarr në qarkun Sancheong, sipas Ministrisë së Sigurisë.
Shumë nga ata që kishin humbur jetën ishin të moshës 60-70-vjeçare, tha Son Chang-ho, një zyrtar i policisë lokale.
Kushtet e thata priten të vijojnë të mërkurën në rajonin e goditur nga zjarri, tha Ministria e Sigurisë.
