JD Vance, zv.president i SHBA-ve, do të bashkohet me gruan e tij Usha në Groenlandë, por udhëtimi është reduktuar në një vizitë të vetëm një baze hapësinore amerikane.
Ndryshimet u njoftuan pasi Usha Vance planifikoi një qëndrim disa ditor në Groenlandë, duke vizituar kryeqytetin Nuuk dhe duke marrë pjesë në ngjarje kulturore, si gara vjetore me qerre me qentë.
Shtëpia e Bardhë tha të martën se JD Vance do t’i bashkohet gruas së tij në Groenlandë, por çifti do të kalojë vetëm një ditë aty, duke vizituar bazën hapësinore amerikane Pituffik në bregun veriperëndimor të ishullit, sipas BBC.
Presidenti amerikan Donald Trump vazhdon kërcënimet për të marrë kontrollin mbi Groenlandën, një territor semi-autonom të Danimarkës, duke thënë se: “Do të duhet ta kemi atë. Na duhet Groenlanda për sigurinë dhe sigurinë ndërkombëtare.”
Ndërkohë që JD Vance do të jetë zyrtari më i lartë amerikan që viziton Groenlandën, një vizitë në një bazë amerikane është më pak e kontestuar se plani fillestar për vizitën e gruas së tij, të cilën kryetari i përkohshëm i qeverisë së Groenlandës, Mute Egede, e quajti një “provokim”.
Ministri i Jashtëm i Danimarkës, Lars Lokke Rasmussen, e quajti vendimin “shumë pozitiv” dhe shtoi se Danimarka “nuk ka asgjë kundër” vizitës së amerikanëve në bazën e tyre.
Ky program i ri gjithashtu do të ulë mundësinë që çifti Vance të përballen me protesta nga banorët lokalë. Gjatë javëve të fundit, qindra persona kanë marrë pjesë në protesta kundër SHBA-ve, disa duke mbajtur pankarta me mbishkrime si “Respektoni marrëveshjet ndërkombëtare” dhe “Yankee, shko në shtëpi.”
Në fillim të marsit, partitë kryesore politike të Groenlandës lëshuan një deklaratë të përbashkët duke dënuar “sjelljen e papranueshme” të Trump.
Kryeministri i dalë, Mute B Egede, shkroi në Facebook se vendi i tij “nuk do të bëhet kurrë SHBA dhe ne groelandezët nuk do të bëhemi kurrë amerikanë… Mjaft më me respektin e munguar.”
Të mërkurën në mëngjes, mediat e Groenlandës raportuan se disa makina të blinduara që ishin dërguar në ishull në përgatitje për vizitën e Usha Vance ishin ngarkuar përsëri në një avion ushtarak amerikan.
Groenlanda – ishulli më i madh në botë, i vendosur midis Oqeanit Arktik dhe Atlantikut – është kontrolluar nga Danimarka për rreth 300 vjet.
Ajo qeveris çështjet e saj të brendshme, por vendimet për politikën e jashtme dhe mbrojtjen merren në Kopenhagë. SHBA ka pasur një interes për sigurinë dhe një prani ushtarake atje që nga Lufta e Dytë Botërore.
