Volumi i pagave ka pësuar rritje të fortë kryesisht në sektorë që lidhen me turizmin, teknologjinë dhe ndërtimin në tremujorin fundit 2024. Niveli i pagave dhe i numrit të të punësuarve ndoqi ciklin e ekonomisë ku sektori prodhues u tkurr vitin e kaluar, teksa shërbimet u zgjeruan nga rritja e numrit të vizitorëve të huaj.
Në tremujorin e fundit të vitit 2024 volumi i pagave shënoi rritjen vjetore më të lartë 42.7 % në bizneset e prodhimit të drurit dhe produkteve të tij, sipas statistikave afatshkurtra. Sektori prej vitesh po vuan mungesën e punonjësve.
Mobilieritë kërkojnë një nivel të lartë kualifikimi në krahasim me sektorët e tjerë. Kërkesa e lartë i ka shtyrë bizneset në këtë sektor të rrisin pagat. Numri i punonjësve në industrinë e drurit u rrit me 10 pikë % gjatë tetor-nëntor 2024, por indeksi i pagave u rrit mbi 42%. Në vitin 2024 në këto biznese ishin të punësuar rreth 7300 punonjës.
Indeksi i volumit të pagave u rrit në agjencitë e udhëtimit me rreth 40 % në tremujorin e fundit 2024 në krahasim me 3-mujorin e fundit 2023. Gjithashtu në këto aktivitete indeksi i punësimit shënoi rritje vjetore me 18 % në të njëjtën periudhe. Në vitin 2023 në agjencitë e udhëtimeve u punësuan rreth 3900 punonjës nga rreth 2500 që ishin në vitin 2019.
Sektori i tregtisë me pakicë gjithashtu rriti me 39 % indeksin e volumit të pagave ndërmjet tre-mujorit të fundit 2023 dhe atij 2024. Sektori i tregtisë me pakicë është punëdhënësi me i madh në ekonomi me 69.342 punonjës në vitin 2023. Indeksi i punësimit në këtë sektor u rrit me tej më 2024 me rreth 22 %.
Aktiviteti i hoteleve u rendit i katërti për rritjen më të larte të indeksit të fondit të pagave me 34 % në tremujorin e katërt 2024, ndërsa indeksi i punësimit u rrit jo më shumë se 10 %. Aktiviteti i hotelerisë është futur në një fazë të vrullshme zhvillimi vitet e fundit prej rritjes së numrit të turistëve. Numri i njësive po zgjerohet me shpejtësi në Tiranë dhe në bregdet. Në vitin 2023 hotelet kishin të punësuar me pagë 13.264 persona sipas informacionit ekonomik për ndërmarrjet nga INSTAT.
Rritja të lartë të indeksit të pagës patën edhe aktivitet e programimit të kompjuterëve me rreth 30 % në tremujorin e fundit 2024 në krahasim me të njëjtën periudhë të vitit 2023. Teksa indeksi i punësimit në këto aktivitete për të njëjtën periudhe u rrit me 19.8 %.
Rritja e pagave nga bashkitë vitin e kaluar rriti gjithashtu indeksin në aktivitet e grumbullimit dhe trajtimit te mbetjeve me 30 %.
Në sektorin e ndërtimit indeksi i pagave u rrit ndërmjet tremujorit të fundit 2023 dhe 2024 me 23 %, ndërsa indeksi i punësimit u rrit me 1,9 pikë %.
Në anën tjetër sektorët që pësuan rënie të indeksit të pagave ishin transporti ajror, industria e tekstileve dhe veshjeve, prodhimi i letrës, transporti hekurudhor (shiko grafikun më poshtë)./Monitor
