Kreu i PD-së Berisha tha sot se qeverisja e tij do gazifikojë vendin ndërsa do shfrytëzojë burimet e diellit dhe erës për prodhimin e energjisë elektrike.
Gjatë një takimi me Dhomën e Tregtisë dhe Industrisë Tiranë, ai theksoi se Shqipëria ka probleme të shumta që i kanë ardhur nga narkoshteti i Ramës.
“Është krijuar në Shqipëri narkoeuro, nuk egziston në asnjë vend tjetër të Europës. Do krijojmë bordin. Për taksën e pronave të pashitura do ndërhyjmë, duhet gjetur një mënyrë pasi ka ndërhyrje nga narkoshteti i tanishëm. Do i paraqesim biznesit një platformë Made in Albania. Shqipëria ka platformë të jashtëzakonshme energjie. Mbetemi të vendosur për shfrytëzimin e diellit dhe erës për prodhimin e energjisë. Do bëjmë gazifikimin e qyteteve dhe do heqim akcizën e gazit.” – tha Berisha.
Ai tha më tej se Shqipëria ka nevojë të riformatimit të sistemit të drejtësisë.
Berisha vërejti gjithashtu se drejtori i vërtetë i Portit të Durrësit është Xhevdet Troplini dhe se qeveria nuk synon të kapë asnjë ngarkesë droge që vjen në port.
“Sot për çështjet civile duhet të presësh 10 deri në 15 vite. Në Gjykatën Kushtetuese janë 150 mijë dosje në pritje. Kina dënon më shumë se çdo vend tjetër, e lufton korrupsionin me masa drakoniane, por në Kinë dënohen dhe politikisht. Ka nevojë për një riformatim të sistemit të drejtësisë. Nuk pret kush 10 vite, se për kaq vite, një biznesmen mund të falimentojë. 62 përqind të të burgosurve janë të paraburgosur, jemi bërë vend “kape e fute” sepse nuk ka prokuror të ndjekë çështjen. Porti i Durrësit ka drejtor të vërtetë Pojën, Xhevdet Troplinin, synimi është mos të kapin asnjë ngarkesë droge.” – shtoi Berisha.
