Kreu i Partisë Demokratike, Sali Berisha, ka mbajtur një fjalim në konferencën “Fuqia e Grave në Politikë”, ku ka falënderuar gratë e Partisë Popullore Evropiane (PPE) për mbështetjen e tyre ndaj PD-së në momentet më të vështira. Gjatë fjalës së tij, ai sulmoi ashpër qeverinë, duke e quajtur atë një “narkodiktaturë” të instaluar për herë të parë në Evropë.
Berisha shprehu mirënjohje për praninë e presidentes së PPE, Rosalia Biro, si dhe për mbështetjen e figurave të njohura si Maria Gabriel dhe Doris Pack, duke vlerësuar kontributin e tyre në mbrojtjen e demokracisë në Shqipëri. Ai theksoi rolin e grave demokrate në betejën për drejtësi dhe liri.
Gjatë fjalimit, Berisha akuzoi qeverinë për kapjen e institucioneve kryesore të drejtësisë dhe medias. Sipas tij, ndonëse në letër ekzistojnë një prokurori dhe media të lira, realiteti është i ndryshëm. “Shqipëria ka një prokurori që arreston dhe burgos pa prova, vetëm për të shënjestruar liderët e opozitës,” tha ai, duke përmendur rastet e deputetëve opozitarë që ndodhen në burg apo nën arrest shtëpie.
Sipas Berishës, situata aktuale ka krijuar frikë dhe terror në shoqëri, duke shtypur zërat kundërshtarë dhe duke dëmtuar procesin demokratik në vend.
