Zyrtari më i lartë i vaksinave në SHBA, Peter Marks është dorëhequr nga posti.
Në letrën e dorëheqjes ai ka përmendur “dezinformimin dhe gënjeshtrat” e Sekretarit të Shëndetësisë Robert F Kennedy Jr. lidhur me vaksinat, shkruan The Guardian.
Dr Peter Marks shërbeu si zyrtari më i lartë i vaksinave të FDA. Media të shumta, duke përfshirë Wall Street Journal dhe New York Times, duke cituar njerëz të njohur me këtë çështje, raportuan të premten vonë se atij i ishte dhënë zgjedhja të jepte dorëheqjen ose të pushohej nga një zyrtar i departamentit të Shëndetit dhe Shërbimeve Njerëzore (HHS). Ai zgjodhi të japë dorëheqjen. FDA-ja është një agjenci kryesore federale brenda HHS.
Në letrën e dorëheqjes, duke iu referuar Kennedy-t, Marks shkroi: “Është bërë e qartë se e vërteta dhe transparenca nuk dëshirohen nga Sekretari, por ai dëshiron konfirmimin e nënshtruar të dezinformatave dhe gënjeshtrave të tij.”
Marks lëshoi gjithashtu një paralajmërim të ashpër, sipas mediave që morën letrën, duke thënë: “Minimi i besimit në vaksinat e njohura që kanë përmbushur standardet e larta për cilësinë, sigurinë dhe efektivitetin dhe që janë caktuar prej dekadash nga FDA-ja është i papërgjegjshëm, i dëmshëm për shëndetin publik dhe një rrezik i qartë për shëndetin dhe sigurinë e kombit tonë.”
Largimi pason raportet se Kennedy i është drejtuar një skeptiku të njohur të vaksinave, David Geier, për të udhëhequr HHS në një studim të lidhjeve të mundshme midis vaksinave dhe autizmit.
Kennedy ka pohuar gjatë seancës dëgjimore në Senat për konfirmimin e tij se ai nuk është kundër vaksinës.
“Nëse Peter Marks nuk dëshiron të mbështesë rikthimin e shkencës në standardin e saj të artë dhe promovimit të transparencës radikale, atëherë ai nuk ka vend në FDA nën udhëheqjen e fortë të Sekretarit Kennedy,” tha një zëdhënës i HHS, shkruan NBC.
