Presidenti amerikan Donald Trump foli sërish për homologun rus, Vladimir Putin, pasi më herët tha se është i zemëruar me të dhe kërcënoi me tarifa doganore ndaj naftës ruse, nëse nuk pranon një marrëveshje armëpushimi në Ukrainë.
Më vonë të dielën, pas intervistës për NBC News ku kritikonte Putin, Trump u tha gazetarëve se ai dhe presidenti rus “gjithmonë kishin shkuar mirë” dhe se ai nuk mendonte se Putin “do e shkelte fjalën e tij”.
Ndërkohë, nga ana tjetër, ai ka kritikuar edhe presidentin ukrainas Volodymyr Zelensky, duke thënë se ai dëshiron të tërhiqet nga marrëveshja për mineralet dhe duke e paralajmëruar se do të përballet me probleme të mëdha nëse e bën këtë gjë.
“Ai po përpiqet të tërhiqet nga marrëveshja për tokat e rralla dhe nëse e bën këtë, ai do të ketë probleme të mëdha. Ai dëshiron të jetë një anëtar i NATO-s, por ai kurrë nuk do të jetë anëtar i NATO-s. Ai e kupton këtë.”, u shpreh Trump./ Reuters
