Pesë persona kanë humbur jetën dhe katër të tjerë janë plagosur rëndë pas një shpërthimi të ndodhur të hënën në një minierë qymyri në rajonin verior të Asturias në Spanjë, njoftuan autoritetet vendase.
Ngjarja ndodhi në minierën Cerredo në Degaña, rreth 450 kilometra në veri-perëndim të Madridit.
Dy minatorë të tjerë që ndodheshin në zonë kanë shpëtuar pa lëndime.
Fillimisht, autoritetet raportuan se dy persona rezultonin të zhdukur, por më vonë konfirmuan se të gjithë janë llogaritur, përcjell The Guardian.
Edhe pse shkaku i shpërthimit ende nuk është përcaktuar, shërbimet e emergjencës raportuan për një problem me një makineri, e cila dyshohet se ka shpërthyer.
Të plagosurit u transportuan në spitalet e qyteteve më të afërta, dy prej tyre me helikopter. Ata kanë pësuar djegie të rënda, ndërsa njëri ka marrë edhe një lëndim në kokë.
Kryeministri i Spanjës, Pedro Sánchez, shprehu ngushëllimet e tij për familjet e viktimave dhe uroi shërim të shpejtë për të plagosurit përmes një mesazhi në platformën X .Ndërkohë, kreu i qeverisë rajonale të Asturias, Adrián Barbón, shpalli dy ditë zie kombëtare në nder të viktimave.
Asturias është një rajon me një traditë të gjatë në industrinë e minierave, të cilat kanë qenë burim kryesor punësimi për shekuj me radhë.
Ngjarja tragjike sjell në kujtesë një tjetër shpërthim të rëndë që ndodhi në vitin 1995 në një minierë pranë qytetit Mieres, ku 14 persona humbën jetën.
