Polonia dhe Shtetet e Bashkuara do të nënshkruajnë një kontratë prej rreth dy miliardë eurosh për mbështetjen logjistike të sistemit të mbrojtjes ajrore Patriot, siç bëri të ditur ministri polak i Mbrojtjes, Uladyslaw Kosiniak-Kamysz për Reuters.
Ministri theksoi se “siguria e qiellit polak është e paçmuar” dhe sqaroi se marrëveshja do të përfshijë mbështetje teknike, trajnime dhe shërbime logjistike për sistemin Patriot brenda forcave të armatosura polake. Kjo do të garantojë gatishmërinë operacionale të sistemit, i cili është pjesë e programit Wisla, një iniciativë për mbrojtjen kundër raketave balistike me rreze të shkurtër veprimi.
Ky program nisi pas blerjes së dy baterive të para Patriot nga Polonia në vitin 2018. Në përgjigje të rritjes së kërcënimeve të sigurisë, përfshirë agresionin rus në Ukrainë, Polonia ka shtuar ndjeshëm investimet në mbrojtje, duke planifikuar të rrisë shpenzimet e saj ushtarake në 4.7% të GDP-së në vitin 2025, nga 4.1% që është planifikuar për këtë vit.
Gjithashtu, Kryeministri Donald Tusk ka propozuar një masë të re, sipas së cilës të gjithë meshkujt e rritur do të kalojnë trajnime ushtarake, ndërsa është duke shqyrtuar tërheqjen nga disa konventa ndërkombëtare që ndalojnë përdorimin e minave dhe municioneve të ndaluara.
Sistemi Patriot është një sistem raketor amerikan që përdor radarë të avancuar për të zbuluar dhe neutralizuar kërcënimet ajrore, përfshirë raketat balistike dhe avionët e armikut, duke ofruar një nivel të lartë mbrojtjeje ajrore për Poloninë dhe aleatët e saj.
