Tregjet e aksioneve në mbarë botën kanë pësuar rënie të ndjeshme në prag të vendosjes së tarifave të reja nga presidenti amerikan Donald Trump, që pritet të hyjnë në fuqi këtë javë.
Indeksi japonez Nikkei ra me më shumë se 4%, ndërsa në Evropë, tregjet hapën me humbje të mëdha. Në Londër, indeksi FTSE 100 humbi rreth 1% në orët e para të tregtimit, duke pasuar lëvizjet e tregjeve aziatike, sipas BBC.
Kjo rënie vjen pasi Trump la të kuptohet se tarifat e reja nuk do të synojnë vetëm vendet me bilancin më të madh tregtar negativ ndaj SHBA-së, por do të përfshijnë të gjitha shtetet.
Presidenti amerikan do të shpallë zyrtarisht tarifat e reja të mërkurën, të cilën ai e ka quajtur “Dita e Çlirimit” për Amerikën. Masat do të vendosen mbi tarifat tashmë ekzistuese për aluminin, çelikun dhe automjetet, si dhe mbi të gjitha mallrat kineze që i nënshtrohen taksave shtesë që nga viti i kaluar.
Ndërkohë, qeveria britanike ka deklaruar se pret të ndikohet nga tarifat amerikane dhe nuk përjashton vendosjen e tarifave hakmarrëse ndaj SHBA-së.
Ekspertët financiarë dhe tregtarë mbeten në pritje të detajeve të plota mbi tarifat e Trump-it. Sipas analistes ekonomike Dharshini David, për shkak të ndryshimeve të vazhdueshme dhe tërheqjeve të mëparshme nga administrata Trump, është ende e paqartë se çfarë konkretisht do të shpallet dhe çfarë ndikimi do të ketë në tregtinë globale dhe ekonominë amerikane.
