Administrata e presidentit Donald Trump ka filluar shkarkimin masiv të punonjësve në agjencitë kryesore të shëndetësisë në SHBA, përfshirë Qendrat për Kontrollin dhe Parandalimin e Sëmundjeve (CDC), Administratën e Ushqimit dhe Barnave (FDA) dhe Institutin Kombëtar të Shëndetësisë (NIH).
Ky veprim është pjesë e një plani më të gjerë për të eliminuar 10,000 vende pune në Departamentin e Shëndetësisë dhe Shërbimeve Njerëzore (HHS).
Ndër ata që u shkarkuan janë Brian King, drejtori i Qendrës për Produktet e Duhanit në FDA, dhe Peter Stein, drejtori i Zyrës për Barnat e Reja në këtë agjenci, i cili dha dorëheqjen pasi u përball me mundësinë e shkarkimit, përcjell Reuters.
Shkurtimet kanë prekur edhe departamentet e barnave, ushqimit, vaksinave dhe pajisjeve mjekësore në FDA, duke shkaktuar pasiguri në mbikëqyrjen e sektorit shëndetësor.
Burime nga agjencitë kanë treguar për situata kaotike të martën në mëngjes, kur punonjësit e shkarkuar u ndaluan në hyrje të godinave dhe u detyruan të dorëzonin kartat e identitetit.
Ata u udhëzuan të kthehen në shtëpi dhe morën udhëzime për të kontaktuar departamentet përkatëse për tërheqjen e pajisjeve të punës.
Një nga punonjësit e CDC, i cili punonte për përgjigjen ndaj shpërthimeve të fruthit, ishte mes atyre që humbën punën, duke ngritur shqetësime për kapacitetin e SHBA-së për të përballuar emergjenca shëndetësore.
Sekretari i Shëndetësisë, Robert F. Kennedy Jr., mbrojti shkurtimet duke i cilësuar ato të nevojshme për të eliminuar burokracinë e tepërt.
Megjithatë, kritikët argumentojnë se largimi i shkencëtarëve kryesorë dhe mungesa e burimeve mund të dëmtojnë përgjigjen e SHBA-së ndaj krizave shëndetësore, përfshirë kërkimin mbi kancerin dhe monitorimin e barnave të reja.
Shkurtimet, të cilat janë pjesë e një plani të mbështetur nga Trump dhe aleati i tij miliarder Elon Musk, pritet të kenë ndikim të thellë në fushën e shëndetit publik dhe politikën amerikane të barnave.
