Më shumë se 50 vende i janë drejtuar Shtëpisë së Bardhë për të nisur bisedime tregtare, deklaroi të dielën një nga këshilltarët kryesorë ekonomikë të presidentit amerikan Donald Trump, teksa zyrtarët amerikanë përpiqeshin të mbronin tarifat e reja të gjera që kanë shkaktuar tronditje globale, përcjell Reuters.
Drejtori i Këshillit Ekonomik Kombëtar të SHBA-së, Kevin Hassett, mohoi që tarifat të ishin pjesë e një strategjie të Trump për të përplasur tregjet financiare dhe për të ushtruar presion mbi Rezervën Federale që të ulë normat e interesit.
Ai theksoi se nuk do të ketë “shtrëngim politik” ndaj bankës qendrore. Të premten, Trump ndau në rrjetin Truth Social një video që sugjeronte se tarifat e tij kishin për qëllim të godisnin tregun e aksioneve me qëllim që të detyrohej ulja e interesave.
Sekretari i Thesarit të SHBA-së, Scott Bessent, minimizoi rënien e tregut të aksioneve dhe deklaroi se “nuk ka arsye” për të pritur një recesion si pasojë e tarifave.
Trump tronditi ekonominë globale të mërkurën e kaluar, kur shpalli tarifa të gjera për importet në SHBA, duke shkaktuar kundërmasa nga Kina dhe duke ndezur frikën për një luftë tregtare globale dhe recesion.
Të dielën, zyrtarët më të lartë të administratës Trump u përpoqën të paraqesin tarifat si një ripozicionim strategjik të SHBA-së në rendin tregtar global, ndërsa ndikimet ekonomike i cilësuan si pasoja afatshkurtra.
Tregjet amerikane të aksioneve kanë rënë me rreth 10% në dy ditët që nga njoftimi për regjimin e ri të tarifave — një rënie që analistët financiarë dhe investitorët e mëdhenj ia atribuojnë agresivitetit të politikave të Trump, të cilat, sipas shumicës së ekonomistëve dhe kreut të Rezervës Federale, rrezikojnë të nxisin inflacionin dhe të dëmtojnë rritjen ekonomike.
Tregjet që tashmë janë të tronditura nga tarifat, përballen me një javë tjetër trazirash, pasi pasojat nga regjimi i ri i tarifave mbajnë investitorët në ankth, pas javës më të keqe për aksionet amerikane që nga fillimi i krizës së COVID-19 pesë vite më parë.
Hassett tha se tarifat e vendosura nga Trump kishin çuar “më shumë se 50 vende” të kontaktonin Shtëpinë e Bardhë për të filluar negociatat tregtare.
Presidenti i Tajvanit, Lai Ching-te, ofroi të dielën heqjen e të gjitha tarifave si bazë për bisedime me SHBA-në, duke premtuar eliminimin e barrierave tregtare në vend të masave kundërpërgjigjëse dhe duke deklaruar se kompanitë tajvaneze do të rrisin investimet në SHBA.
Ndryshe nga shumë ekonomistë, Hassett tha se nuk priste ndikim të madh mbi konsumatorët, sepse eksportuesit do të priren të ulin çmimet për të mbetur konkurrues.
Nga ana tjetër, Bessent tha se nuk pret recesion për shkak të tarifave, duke përmendur rritjen më të lartë se sa pritej të vendeve të punës në SHBA.
