Anëtari i Kryesisë së Partisë Demokratike, Belind Këlliçi, ishte një nga folësit kryesorë në prezantimin e programit elektoral të PD-së në Pallatin e Kongreseve, gjatë punimeve të Kuvendit Kombëtar të partisë.
Në fjalimin e tij, Këlliçi kritikoi qeverinë aktuale dhe veçanërisht disa ministra të kabinetit Rama, duke e cilësuar situatën aktuale si të papranueshme për qytetarët. Ai theksoi se shqiptarët janë të zhgënjyer dhe të lodhur nga premtimet boshe të mazhorancës.
Duke ironizuar sloganet e Partisë Socialiste, Këlliçi u shpreh se qytetarët e Tiranës e kanë refuzuar “tallavanë e PS-së”, duke parë me skepticizëm fushatën e tyre të bazuar mbi premtime të pambajtura.
Një pjesë e rëndësishme e fjalimit të tij iu kushtua ministres së Infrastrukturës, Belinda Balluku, të cilën e akuzoi për korrupsion dhe shpërdorim të fondeve publike. Ai tha se Balluku ka shpenzuar 24 milionë euro për çdo kilometër rrugë, duke ngritur dyshime për keqpërdorim të buxhetit.
Këlliçi akuzoi gjithashtu ministren për përfshirje në projekte të dyshimta, si parqet fotovoltaike dhe blerjet e termocentraleve “Tigri 1” dhe “Tigri 3”, me një kosto prej rreth 100 milionë euro. Ai denoncoi gjithashtu tentativat për t’u marrë tokat fermerëve në favor të biznesmenëve të lidhur me pushtetin.
Në përmbyllje, Këlliçi u shpreh se më 11 maj qytetarët kanë mundësinë të ndëshkojnë këtë qeveri dhe t’i japin fund keqqeverisjes, duke mbështetur alternativën e ofruar nga Partia Demokratike.
