Irani dhe Shtetet e Bashkuara zhvilluan angazhimin e tyre të parë diplomatik prej vitesh të shtunën në kryeqytetin e Omanit, Muscat, me diskutime të përqendruara në programin bërthamor të Teheranit dhe lehtësimin e mundshëm të sanksioneve amerikane.
Bisedimet dy orë e gjysmë u drejtuan nga ministri i Jashtëm iranian Seyed Abbas Araghchi dhe i dërguari special i Shtëpisë së Bardhë për Lindjen e Mesme Steve Witkoff.
Edhe pse negociatat u zhvilluan në mënyrë të tërthortë me ndërmjetësimin e Omanit, krerët e dy delegacioneve – Araghchi dhe Witkoff – folën shkurtimisht ballë për ballë në prani të ministrit të Jashtëm të Omanit, Badr al-Busaidi pas përfundimit të bisedimeve zyrtare, shkruan Rt.
Duke iu drejtuar gazetarëve në Muscat, Araghchi e përshkroi raundin e parë të negociatave si “konstruktiv” që u mbajt në një “atmosferë të qetë dhe shumë respektuese”.
“Nuk u përdor asnjë gjuhë e papërshtatshme dhe të dy palët treguan përkushtimin e tyre për të çuar përpara bisedimet deri në arritjen e një marrëveshjeje të favorshme të ndërsjellë nga një pozicion i barabartë”, tha ministri iranian.
Sipas Araghchi, të dyja palët synojnë të përvijojnë një kornizë të përgjithshme për një marrëveshje të ardhshme në raundin e ardhshëm të bisedimeve. Ai bëri me dije se takimi i dytë është caktuar për 19 prill, edhe pse mund të mos zhvillohet në Muscat.
“Në raundin e ardhshëm të bisedimeve, ne do të përpiqemi të hyjmë në agjendën e negociatave, e cila natyrisht do ketë një kalendar krahas saj”, tha ai, duke shprehur shpresën se të dyja palët mund të përmbyllin një plan për fillimin e “bisedimeve të vërteta” së shpejti.
Duke folur me gazetarët në bordin e Air Force One të shtunën mbrëma, Presidenti Donald Trump tha se bisedimet me Teheranin “po shkojnë mirë”.
