Një valë e re sulmesh ajrore izraelite goditi të dielën disa zona të Rripit të Gazës, përfshirë edhe Spitalin Al-Ahli në qytetin e Gazës, duke lënë të paktën 21 viktima, mes tyre edhe fëmijë.
Sipas drejtorit të spitalit, Dr. Fadel Naim, sulmi ndodhi para agimit dhe shkaktoi dëme të mëdha në dhomën e urgjencës, farmaci dhe repartet përreth, duke ndikuar mbi 100 pacientë dhe dhjetëra punonjës shëndetësorë.
Ministria e Shëndetësisë në Gaza raportoi se një vajzë humbi jetën gjatë evakuimit për shkak të pamundësisë për t’i ofruar ndihmë mjekësore. Ushtria izraelite deklaroi se kishte shënjestruar një qendër komanduese të Hamasit brenda spitalit, por nuk ofroi prova, ndërsa Hamasi mohoi akuzat.
Spitali drejtohet nga Dioqeza Episkopale e Jeruzalemit, e cila dënoi sulmin, duke e cilësuar një akt të rëndë që ndodhi në Ditën e Palmave, një ditë e shenjtë për besimtarët e krishterë.
Sulmet nuk u ndalën me kaq – më vonë gjatë së dielës, një makinë civile në Deir al-Balah u shënjestrua, duke vrarë të paktën shtatë persona, mes tyre gjashtë vëllezër që punonin për një organizatë bamirësie. Vëllai më i vogël ishte vetëm 10 vjeç. Babai i tyre, Ibrahim Abu Mahadi, u shpreh i shkatërruar: “Për çfarë mëkati u vranë?”
Izraeli më vonë pohoi se kishte eliminuar një nënkryetar të celulës snajper të Hamasit.
Një tjetër sulm ajror pasdite goditi një shtëpi në kampin e refugjatëve Jabaliya, duke lënë të vdekur të paktën shtatë persona, përfshirë dy gra.
Ndërsa sulmet vazhdojnë, situata humanitare në Gaza mbetet alarmante, me spitale të dëmtuara dhe civilë gjithnjë e më të pambrojtur./AP
