Sony ka rritur çmimin e konsolës PlayStation 5 me 25%, në një kohë kur industria e videolojërave po përballet me pasojat e tarifave të vendosura nga presidenti amerikan Donald Trump.
Gjiganti japonez i teknologjisë njoftoi se ka marrë “një vendim të vështirë” për të rritur çmimin e versionit digjital të PS5 në £429.99 në Mbretërinë e Bashkuar dhe €499.99 në Evropë, duke nisur nga e hëna. Ndërkohë, çmimi i versionit standard të pajisjes, i cili përfshin disk drive, nuk do të ndryshojë.
Sipas kompanisë, vendimi erdhi si pasojë e “një mjedisi ekonomik sfidues, përfshirë inflacionin e lartë dhe luhatjet e kursit të këmbimit valutor”, që po ndikon në tregjet e Evropës, Lindjes së Mesme, Afrikës dhe Oqeanisë, sipas The Guardian.
Në Australi, versioni standard i PS5 do të shkojë në A$829.95, ndërsa versioni digjital do të rritet në A$749.95. Në Zelandën e Re, çmimi i konsolës standarde do të arrijë në NZ$949.95 dhe versioni digjital në NZ$859.95.
Industria e teknologjisë po përpiqet të përshtatet me ndikimin e mundshëm të tarifave të reja të Trumpit në zinxhirët e furnizimit. Konkurrenti japonez Nintendo publikoi pajisjen e re dore, Switch 2, një ditë para se Trump të niste valën e tarifave “reciproke” mbi mallrat e huaja më 2 prill.
Vetëm pak ditë më pas, kompania shtyu porositë paraprake të pajisjes në SHBA për të vlerësuar efektin e tarifave.
Japonia është goditur nga një tarifë 24% mbi eksportet drejt SHBA-së që nga dita që Trump e quajti “dita e çlirimit”, më 2 prill. Shumica e tarifave janë pezulluar për 90 ditë, por kryeministri japonez Shigeru Ishiba deklaroi të hënën se vendi i tij nuk do të bëjë lëshime të mëdha në bisedimet me SHBA-në dhe se nuk do të nxitojë drejt një marrëveshjeje. Negociatat mes dy qeverive pritet të zhvillohen këtë javë.
Kompani si Apple, produktet e së cilës montohen kryesisht në Kinë, gjithashtu po përgatiten për rritje të kostove.
Analistët e bankës investuese UBS paralajmëruan se çmimi i një iPhone 16 Max me 256 GB memorie mund të rritet me 79%, nga 1,199 dollarë (915 £) në rreth 2,150 dollarë (1,600 £), nëse zbatohen të gjitha tarifat e reja që arrijnë deri në 145%.
Megjithëse ende ka shumë paqartësi rreth politikës tregtare të Trumpit, aksionet japoneze u rritën të hënën pasi SHBA-ja njoftoi se do të pezullonte përkohësisht tarifat mbi disa pajisje elektronike, përfshirë smartfonët. Indeksi i aksioneve kryesore në Tokio, Nikkei 225, u mbyll me një rritje prej 1%.
Megjithatë, zyrtarët amerikanë paralajmëruan të dielën se ky pezullim do të jetë i përkohshëm dhe se tarifat ndaj smartfonëve, laptopëve dhe produkteve të tjera elektronike kineze do të rikthehen së shpejti. Trump deklaroi të dielën se askush “nuk do të shpëtojë pa pasoja”.
Në një postim në rrjetin e tij social *Truth Social*, presidenti premtoi një hetim kombëtar për sigurinë tregtare në sektorin e çipave dhe në “tërë zinxhirin e furnizimit elektronik”.
“Ne nuk do të mbahemi peng nga vende të tjera, veçanërisht nga kombe armike tregtare si Kina,” shkroi Trump.
