Raporti vjetor i Strukturës së Posaçme Kundër Korrupsionit dhe Krimit të Organizuar (SPAK) për vitin 2024 tregon për një vit me rezultate në luftën kundër korrupsionit dhe krimit të organizuar, por edhe me sfida në rrugëtimin e institucionit drejt forcimit të shtetit të së drejtës.
Sipas dokumentit zyrtar, përcjellë nga Shqiptarja.com, SPAK ka rritur ndjeshëm numrin e hetimeve penale krahasuar me një vit më parë – janë regjistruar gjithsej 793 procedime penale, me një rritje prej 9.7%. Po ashtu, janë regjistruar 65 hetime të nisura kryesisht, duke reflektuar një qasje më proaktive ndaj ndjekjes penale.
Në luftën kundër krimit të organizuar, SPAK ka regjistruar një rritje prej 18.8% të çështjeve të reja dhe 21.6% më shumë persona të hetuar krahasuar me vitin 2023. Ndërkohë, në luftën kundër korrupsionit janë hetuar 33 ish-zyrtarë të lartë, prej të cilëve 19 janë dërguar për gjykim, çka përbën më shumë se gjysmën e rasteve.
Arritje janë shënuar edhe në aspektin ekonomik: vlera e aseteve të sekuestruara dhe të konfiskuara nga SPAK gjatë 2024 kap shifrën 65.5 milion euro, me një rritje prej 59.7% krahasuar me vitin e kaluar.
Megjithatë, SPAK nënvizon disa problematika shqetësuese që vijojnë të ndikojnë punën e institucionit, si presioni politik e mediatik, mungesa e referimeve nga institucionet publike (sidomos nga Policia e Shtetit), dhe vonesa në përfundimin e sistemit të administrimit të çështjeve.
Raporti vlerësohet pozitivisht nga Bashkimi Europian, i cili njeh përparimet e arritura dhe e konsideron SPAK si një shtyllë kyçe në procesin e integrimit të Shqipërisë në BE. Gjithsesi, rekomandimet e BE-së mbeten të qarta: intensifikim i hetimeve financiare, luftë më e fortë kundër korrupsionit në nivelet e larta, dhe bashkëpunim më i gjerë me agjencitë ndërkombëtare.
SPAK mbyll raportin duke theksuar nevojën për më shumë mbështetje institucionale dhe burime njerëzore, me qëllim që të ruajë ritmin pozitiv dhe të forcojë besimin e publikut në drejtësi.
Për të lexuar raportin e plotë klikoni këtu.
