Ministri për Evropën dhe Punët e Jashtme, Igli Hasani, ka reaguar lidhur me plagosjen e një punonjësi të ministrisë së Jashtme ditën e sotme në Tiranë, pasi u përplas nga një makinë teksa kalonte vizat e bardha.
Hasani falenderon Urgjencën Kombëtare, Spitalin e Traumës dhe Policinë e Shtetit për gatishmërinë dhe profesionalizmin e treguar në reagimin ndaj aksidentit dhe njofton se punonjësi i ministrisë së Jashtme është jashtë rrezikut për jetën.
“Shpreh mirënjohjen time për Urgjencën Kombëtare, Spitalin e Traumës dhe Policinë e Shtetit për gatishmërinë dhe profesionalizmin e treguar në reagimin ndaj aksidentit të ndodhur pak orë më parë, ku një koleg i yni u përplas nga një automjet ndërsa po kalonte rrugën pranë Ministrisë për Evropën dhe Punët e Jashtme.
Ndërkohë që autoritetet përkatëse po punojnë për të sqaruar rrethanat e ngjarjes, dëshiroj të informoj se kolegu ynë është jashtë rrezikut për jetën, në gjendje stabël dhe nën kujdesin e mjekëve të Spitalit të Traumës”,- shkruan Hasani.
