Qeveria e Spanjës ka njoftuar një plan investimi prej 10.5 miliardë eurosh për të siguruar që vendi do të arrijë këtë vit angazhimin e vonuar ndaj NATO-s për të shpenzuar 2% të PBB-së për mbrojtjen.
Kryeministri Pedro Sánchez deklaroi se plani i ri, i cili fokusohet në teknologji dhe industri të mbrojtjes, do të ndihmojë Spanjën të përballet me sfidat aktuale dhe të ardhshme të sigurisë.
Spanja aktualisht shpenzon rreth 1.3% të PBB-së për mbrojtjen, ndjeshëm më pak se vendet e tjera perëndimore, dhe kishte premtuar më herët se do të arrinte objektivin prej 2% deri në vitin 2029, sipas The Guardian.
Por të martën, Sánchez konfirmoi se vendi do ta arrijë këtë shifër që në vitin 2025, përmes një “plani industrial dhe teknologjik për sigurinë dhe mbrojtjen” të miratuar nga kabineti dhe që do t’i paraqitet NATO-s dhe BE-së.
Ai theksoi se plani do të përqendrohet kryesisht në telekomunikacion, siguri kibernetike dhe pajisje ushtarake.
Sipas tij, kërcënimet ndaj Europës janë gjithnjë e më të sofistikuara: “Armiku nuk përdor vetëm raketa – siç kemi parë në Ukrainë këto tre vite – por edhe dronë pa pilot, forca paramilitare për të sabotuar zinxhirët e furnizimit, për të prerë gazsjellës dhe kabllo nënujorë.
Ata përdorin rrjetet sociale për të përhapur dezinformim dhe për të polarizuar opinionin publik, si dhe sulme kibernetike me inteligjencë artificiale për të goditur jetën tonë demokratike.”
Sánchez tha gjithashtu se plani përmbush zotimin e bërë nga paraardhësit e tij konservatorë në vitin 2014 dhe se ai synon të forcojë sigurinë europiane në kohë rekord.
“Në një botë të dominuar nga pasiguria, Europa është shpresë dhe siguri – dhe kjo siguri duhet mbrojtur me sisteme të forta mbrojtjeje. Sepse është bërë e qartë se vetëm Europa mund ta mbrojë veten. Dhe Spanja do të kontribuojë për ta mbrojtur,” tha ai.
Kryeministri spanjoll e quajti “neo-imperializmin” e Vladimir Putinit një kërcënim për sigurinë europiane, pavarësisht distancës gjeografike të vendeve anëtare të BE-së nga linja e frontit në Ukrainë.
“Siguria e Ukrainës, e Europës Lindore, vendeve baltike dhe nordike, është edhe siguria e Spanjës,” theksoi ai.
Sánchez siguroi se rritja e shpenzimeve për mbrojtje nuk do të përkthehet në rritje taksash, as në shkurtime të shpenzimeve sociale apo rritje të deficitit buxhetor.
Megjithatë, partnerët e koalicionit nga platforma e majtë Sumar e kanë kritikuar planin si “të paqëndrueshëm” dhe “ekzagjerues”.
Në janar, ish-presidenti amerikan Donald Trump rriti presionin ndaj vendeve të NATO-s, duke kërkuar që ato të rrisin kontributin për mbrojtjen deri në 5% të PBB-së.
Sekretari i përgjithshëm i NATO-s, Mark Rutte, ka inkurajuar shtetet anëtare të përshpejtojnë vetë angazhimet për rritjen e shpenzimeve.
Ai vuri në dukje se presioni po jep rezultate në vende si Spanja, Portugalia, Belgjika dhe Italia.
“Po i marr në telefon dhe po u them që ta arrijnë objektivin prej 2% deri në verë. Nëse nuk më dëgjojnë, mund të marrin në telefon një zotëri shumë, shumë të duruar nga Uashingtoni,” deklaroi Rutte me ironi.
