India ka shpallur një sërë masash të rrepta kundër Pakistanit, vetëm një ditë pasi 26 persona u vranë nga persona të armatosur në një sulm të ndodhur në rajonin e administruar nga India në Kashmir. Në mesin e masave janë: mbyllja e pikës kryesore kufitare që lidh të dy vendet, pezullimi i marrëveshjes për ndarjen e ujërave, si dhe dëbimi i diplomatëve pakistanezë, përcjell BBC.
Autoritetet indiane kanë anuluar gjithashtu disa viza të qytetarëve pakistanezë dhe u kanë dhënë atyre dy ditë kohë për të lënë vendin. India ka kërkuar që Pakistani të heqë dorë nga “mbështetja për terrorizmin ndërkufitar” – një akuzë që Islamabadi e mohon kategorikisht.
Sulmi ndodhi të martën në Pahalgam, një zonë turistike në Himalaje, ku u vranë dhjetëra turistë, dhe është konsideruar si një nga incidentet më të rënda në vitet e fundit në Kashmirin e administruar nga India. Prej dekadash, rajoni me shumicë myslimane është përfshirë nga një kryengritje e vazhdueshme.
Qeveria indiane ka reaguar ashpër, duke e mbajtur Pakistanin indirekt përgjegjës për sulmin. Agjencitë indiane të sigurisë besojnë se grupi i quajtur “Rezistenca e Kashmirit” qëndron pas sulmit, megjithëse kjo nuk është konfirmuar në mënyrë të pavarur nga burime ndërkombëtare. Operacionet për kapjen e autorëve të sulmit ishin ende në vijim deri të mërkurën në mbrëmje.
Ndërkohë, qeveria pakistaneze ka njoftuar mbledhjen e Këshillit Kombëtar të Sigurisë – organi më i lartë ushtarak dhe i sigurisë në vend – për ditën e enjte. Ministria e Jashtme e Pakistanit ka shprehur “shqetësim për humbjen e jetëve të turistëve” dhe ka dërguar ngushëllime për viktimat.
Si pjesë e masave të ndërmarra, India ka urdhëruar dëbimin e këshilltarëve ushtarakë pakistanezë që vepronin në ambasadën e Pakistanit në Delhi dhe ka paralajmëruar dëbime të tjera diplomatike gjatë javës së ardhshme.
Sulmi në Pahalgam ka rritur rrezikun për një përshkallëzim të mëtejshëm të tensioneve midis dy rivalëve bërthamorë. Qeveria indiane ka deklaruar se “autorët e sulmit do të përballen me drejtësinë dhe sponsorët e tyre do të mbahen përgjegjës.” Ministri i Mbrojtjes, Rajnath Singh, theksoi se reagimi i Indisë nuk do të kufizohet vetëm në autorët e drejtpërdrejtë, por edhe te ata që “kanë konspiruar pas skenës për të kryer sulme në tokën indiane.”
Sulmi ka ngjallur zemërim dhe trishtim të thellë në Indi, ndërsa është dënuar gjerësisht edhe nga liderë ndërkombëtarë. Dëshmitarët përshkruajnë skena kaotike dhe të përgjakshme, teksa pushues, përfshirë familje të tëra, vraponin për të shpëtuar. Sipas disa dëshmitarëve, sulmuesit duket se synonin jo-myslimanët, ndërsa të tjerë e kanë përshkruar sulmin si të rastësishëm. Pjesa më e madhe e viktimave ishin burra hindu, por mes tyre kishte edhe një burrë mysliman lokal. Deri tani, qeveria indiane nuk ka dhënë një deklaratë zyrtare nëse njerëzit u shënjestruan në bazë të përkatësisë fetare.
