Një sulm i përmasave të mëdha me raketa dhe dronë nga forcat ruse goditi kryeqytetin ukrainas, Kievin, gjatë natës, duke lënë të vrarë nëntë persona dhe duke plagosur 63 të tjerë, mes tyre edhe gjashtë fëmijë. Lajmin e konfirmuan autoritetet ukrainase të enjten në mëngjes.
Sipas Administratës Ushtarake të Qytetit të Kievit, sulmi përfshiu dronë dhe raketa balistike, të cilat goditën disa zona të qytetit rreth orës 01:00 pas mesnate. Shërbimi Shtetëror i Emergjencave njoftoi se të paktën 42 persona u shtruan në spital për shkak të plagëve të marra.
Operacionet e shpëtimit vazhduan gjatë orëve të para të mëngjesit për të gjetur trupat e viktimave nën rrënojat e ndërtesave të shkatërruara. Në disa zona u raportuan zjarre në ndërtesa banimi, ndërsa lagjja Sviatoshynskyi ishte një nga më të goditurat, ku një ndërtesë banimi u përfshi nga flakët pas sulmit.
Kreu i administratës ushtarake të qytetit, Tymur Tkachenko, tha se janë goditur të paktën katër lagje të kryeqytetit. Associated Press raportoi se ekipet e shpëtimit janë parë duke gërmuar për të shpëtuar njerëz të bllokuar dhe duke nxjerrë trupat e pajetë nga rrënojat.
