Steve Witkoff, emisari i posaçëm i presidentit amerikan Donald Trump, ka mbërritur në Moskë përpara bisedimeve të pritshme me presidentin rus Vladimir Putin, në një përpjekje të re për të shtyrë përpara një marrëveshje për përfundimin e luftës në Ukrainë.
Ministri i Jashtëm rus, Sergey Lavrov, konfirmoi për BBC se Moska është “gati për të arritur një marrëveshje” me Shtetet e Bashkuara për t’i dhënë fund konfliktit, megjithëse, sipas tij, disa elementë të saj duhet ende të “përpunohen”.
“Presidenti i Shteteve të Bashkuara beson – dhe mendoj me të drejtë – se po ecim në drejtimin e duhur”, u shpreh ai.
Ndërkohë, në Ukrainë, kryebashkiaku i Kievit, Vitali Klitschko, ka pranuar se vendi mund të detyrohet të japë territore si pjesë e një marrëveshjeje paqeje. Kjo deklaratë ka shkaktuar debat në opinionin publik ukrainas, ndërkohë që luftimet vijojnë.
Në zhvillime të tjera, tre persona, përfshirë një fëmijë dhe një grua 76-vjeçare, kanë humbur jetën në një sulm të fundit me dron rus në Ukrainë.
