Kina duket se ka hequr në heshtje tarifat hakmarrëse prej 125% për disa gjysmëpërçues të prodhuar në Shtetet e Bashkuara, sipas informacioneve të dhëna për CNN të premten nga tre agjenci importi në qytetin jugor të teknologjisë, Shenzhen.
Sipas agjencive, përjashtimet vlejnë për qarqet e integruara, të njohura ndryshe si mikroçipe apo gjysmëpërçues. Këto përjashtime, të cilat nuk janë shpallur zyrtarisht, janë zbuluar të enjten në mbrëmje.
Më 12 prill, Kina kishte rritur në 125% tarifat reciproke ndaj të gjitha mallrave me origjinë nga SHBA, si kundërpërgjigje ndaj vendimit të Presidentit amerikan Donald Trump për të rritur në 145% tarifat për mallrat kineze.
Për muaj me radhë, Pekini ka treguar vendosmëri dhe besim për të përballuar një luftë tregtare me SHBA-në, por përjashtimet e fundit sugjerojnë se Kina është e detyruar të heqë taksa për disa artikuj thelbësorë që nuk mund t’i prodhojë vetë apo t’i importojë nga vende të tjera.
Autoritetet kineze nuk e kanë konfirmuar publikisht këtë vendim. Administrata e Përgjithshme e Doganave dhe zyrat doganore në qytetet portuale Shenzhen dhe Zongshan, në provincën Guangdong, thanë se nuk janë në dijeni të përjashtimeve.
CNN ka kërkuar koment nga ministritë kineze të tregtisë dhe të punëve të jashtme.
Chen Shaoling, një menaxhere në kompaninë e logjistikës Zhengnenliang Supply Chain, tha për CNN se të enjten zbuloi se tarifat për tetë lloje të qarqeve të integruara – që përfshijnë shumicën e gjysmëpërçuesve, përveç çipave të memories – ishin ulur në zero. Ajo shtoi se zbulimi ndodhi gjatë një procesi rutinë zhdoganimi për klientët e saj.
“E morëm vesh vetëm pasi dorëzuam deklaratën – pa e bërë këtë hap, nuk do ta dinim,” tha Chen. “Lajmi po përhapet tani si zjarr i egër.”
Autoriteti doganor në Shenzhen duket se ka informuar disa kompani për këtë ndryshim. Kompania Shenzhen HJET Supply Chain postoi të enjten në rrjetin e saj zyrtar të mediave sociale një njoftim që thoshte: “Lajm fantastik! Kemi marrë një njoftim të ri nga Dogana e Kinës, që njofton se tetë kode tarifore që lidhen me gjysmëpërçuesit/qarqet e integruara tani janë të përjashtuar nga tarifat shtesë për importet nga SHBA.”
Postimi shtonte se importet me origjinë amerikane që përfshihen në këto kode do të hyjnë në Kinë me tarifa zero.
Një punonjëse e kompanisë e cila mori një telefonatë nga CNN konfirmoi politikën e re, duke thënë se kompania u njoftua nga doganat lokale të enjten.
Taihang Semiconductor, një kompani tjetër me bazë në Shenzhen që importon çipa, konfirmoi se ka marrë një njoftim nga doganat, por nuk dha më shumë detaje. “Është padyshim një zhvillim pozitiv,” tha një anëtar i stafit.
Revista kineze e biznesit Caijing raportoi të premten për përjashtimet, duke përmendur disa kompani teknologjike importuese të gjysmëpërçuesve, përfshirë një të bazuar në Shangai. Artikulli u hoq nga faqja rreth tre orë pas publikimit.
