Presidenti i Rusisë, Vladimir Putin, falënderoi të hënën liderin e Koresë së Veriut, Kim Jong Un, për dërgimin e trupave për të ndihmuar Rusinë në rikthimin e territorit nga forcat ukrainase në rajonin e Kurskut, përcjell The Moscow Times.
“Miqtë koreanë vepruan të udhëhequr nga ndjenja solidariteti, drejtësie dhe miqësie të vërtetë,” citohet të ketë thënë Putin nga Kremlini. “E vlerësojmë shumë dhe jemi thellësisht mirënjohës personalisht për shokun Kim Jong Un… dhe për popullin koreano-verior.”
Gjatë fundjavës, Shefi i Shtabit të Përgjithshëm të Rusisë, Valery Gerasimov, gjithashtu lavdëroi “heroizmin” e ushtarëve koreanoveriorë, duke thënë se ata “ofruan ndihmë të rëndësishme në mposhtjen e forcave ukrainase.”
Koreja e Veriut konfirmoi të hënën për herë të parë se kishte dërguar trupa në Rusi. Agjencia shtetërore e lajmeve KCNA raportoi se ushtarët nga Pheniani morën pjesë në operacione luftarake për të rimarrë territore në rajonin e Kurskut, ku Ukraina kreu një inkursion të papritur në gusht.
Kjo konfirmim vjen pas muajsh raportimesh nga agjencitë e inteligjencës së Koresë së Jugut dhe Perëndimit, të cilat pretendonin se Pheniani kishte dërguar mbi 10,000 ushtarë për të ndihmuar Rusinë në Kursk vitin e kaluar.
“Forcat koreano-veriore morën pjesë në operacionet për çlirimin e zonave të Kurskut,” citohet të ketë deklaruar Komisioni Qendror Ushtarak i vendit, sipas KCNA.
Kim tha se dislokimi i trupave ishte në përputhje me një traktat mbrojtjeje të ndërsjellë me Rusinë dhe i quajti ushtarët “heronj dhe përfaqësues të nderit të atdheut,” sipas KCNA.
Ai shtoi se një monument në nder të “akteve të tyre heroike në betejë” do të ndërtohet së shpejti në kryeqytetin koreano-verior dhe pranoi publikisht viktimat, duke përmendur “gurët varrorë të ushtarëve të rënë.”
“Kombi duhet të marrë masa të rëndësishme për të nderuar dhe kujdesur në mënyrë të veçantë për familjet e veteranëve të luftës,” tha Kim.
Ndërkohë, Ministria e Mbrojtjes së Koresë së Jugut deklaroi të hënën se dislokimi i trupave nga Koreja e Veriut përbën shkelje të rezolutave të Këshillit të Sigurimit të OKB-së dhe e akuzoi Phenianin se “ka pranuar vetë veprimet e tij kriminale.”
