Rebelët Houthi të Jemenit thanë të hënën se një sulm ajror i dyshuar amerikan goditi një burg ku mbaheshin emigrantë afrikanë, duke vrarë të paktën 30 persona.
Ky informacion u raportua nga kanali satelitor i lajmeve al-Masirah, i kontrolluar nga Houthi-t. Deri tani, nuk ka pasur konfirmim të pavarur për numrin e viktimave dhe ushtria amerikane nuk e ka pranuar se ka kryer sulmin në provincën Saada, një bastion i rebelëve.
Sipas al-Masirah, në këtë burg mbaheshin rreth 100 të burgosur. Pamjet grafike të transmetuara nga televizioni tregonin trupa të pajetë dhe persona të plagosur.
Rebelët Houthi deklaruan se sulmi vrau dhe plagosi disa prej emigrantëve të burgosur, të cilët kryesisht vinin nga Etiopia dhe vende të tjera afrikane, në përpjekje për të kaluar në Arabinë Saudite në kërkim të punës.
Ky sulm është ngjarja më e fundit në konfliktin dhjetëvjeçar të Jemenit, ku emigrantët shpesh përballen me rreziqe të mëdha gjatë udhëtimit të tyre.
Ngjarja pritet të rikthejë vëmendjen ndaj fushatës amerikane të sulmeve ajrore kundër rebelëve Houthi, e njohur si “Operacioni Rough Rider”, ndërkohë që administrata amerikane vazhdon bisedimet me Iranin mbi programin bërthamor të Teheranit.
Komanda Qendrore e Ushtrisë Amerikane, në një deklaratë të bërë para se të publikohej lajmi për sulmin, tha se për arsye sigurie nuk jep detaje për operacionet e saj aktuale apo të ardhshme.
“Ne jemi shumë të kujdesshëm në qasjen tonë operacionale, por nuk do të zbulojmë specifika për atë që kemi bërë ose do të bëjmë”, thuhej në deklaratë.
Ushtria amerikane nuk iu përgjigj menjëherë pyetjeve të agjencisë Associated Press lidhur me sulmin e supozuar në Saada.
Pamjet e transmetuara nga al-Masirah tregonin pasoja të rënda të shpërthimit, me trupa të pajetë dhe të plagosur të shtrirë në vendin e ngjarjes.
Muret e objektit ishin të dëmtuara rëndë nga shpërthimi, me mbetje betoni të shpërndara gjithandej.
Në sfond dëgjohej zëri i një gruaje që recitonte një lutje në arabisht: “Në emër të Zotit”, ndërsa herë pas here dëgjoheshin të shtëna armësh, ndërkohë që ekipet mjekësore përpiqeshin të ndihmonin të plagosurit./AP
