Zyrtari i NATO-s, Robert Pszczel, ka deklaruar se aleanca nuk është kundër krijimit të ushtrisë së Kosovës.
Ai e ka shprehur këtë gjatë një konfderence për mediat nga kryeqyteti i Serbisë, Beogradi, ku ndër të tjera ka theksuar se NATO nuk është kundër por krijimi i ushtrisë së Kosovës duhet bërë në përputhje me Kushtetutën e vendit ballkanik.
Pszczel ka theksuar se transformimi i forcave të sigurisë së Kosovës është e drejtë e qeverisë nga Kosova, raporton “Lajmi.net”.
“Nëse do ua merrnim atë të drejtë, e dimë se si do ishte situata atje dhe çfarë kuptimi do kishte”, deklaroi Pszczel.
Më tej ai shtoi se NATO nuk planifikon zvogëlimin e forcave të KFOR-it në Kosovë, por misioni i tyre do varet edhe nga gjendja e sigurisë në vend.
Kurse, këshilltari i Ministrit të Punëve të Jashtme të Serbisë, Branimir Filipoviq ka thënë se qëndrimi i Serbisë për transformimin e forcave të sigurisë së Kosovës në ushtri është në kundërshtim me Rezolutën 1244 të Kombeve të Bashkuara.
