Kryeministri Edi Rama, ka reaguar lidhur me akuzat që ia janë drejtuar nga politikanë dhe mediat greke, por edhe ato shqiptare, se ka “hedhur benzinë zjarrit”, lidhur me qëndrimin e mbajtur për ceremoninë mortore të minoritarit të vrarë, Kostandin Kacifa.
“Sipas kokave të përndezura të politikës greke e kazanëve të atjeshëm, dje i paskam hedhur benzinë zjarrit, ndërsa sipas Kadrinjve tanë politikë e mediatikë paskam pranuar në heshtje përdhosjen e vendit! S’ka më mirë se sa i sulmuar nga dy palë qirie Kadrinj që s’i duhen dreqit.”, shkruan Rama.
“Provokon Edi Rama. Është qesharake që shqiptarët pagëzojnë kishën, një garazh”, e niste shkrimin e saj e përditshmja greke, Ethnos.
Sipas gazetës, kryeministri shqiptar ka bërë deklarata te forta pas shkatërrimit nga ana e autoriteteve vendore të kishës së Shën Thanasit në Dhërmi të Himarës, ndërsa nuk ngurroi ta quante kishën si “garazh”.
Po ashtu edhe e përditshmja e djathtë, Demokratia, shkruan se Edi Rama “i ka hedhur benzinë zjarrit me deklaratat e tij”.
Shefi i çështjeve të jashtme të partisë “Demokracia e Re” në Greqi, Jorgos Kumucakos, thotë se kryeministri shqiptar e ka tejkaluar vetveten sa i përket arrogancës dhe sensit të masës.
“Pas nënteksteve nacionaliste për Shqipërinë e Madhe, pas deklaratave që vinin në diskutim të drejtat sovrane të Greqisë në zonat detare, tani zoti Rama cilëson si garazh kishën e Shën Thanasit në Dhërmi”, thotë politikani i cili shton: “Këto deklarat të kryeministrit shqiptar krijojnë një tensione. Ato sabotojne pespektivat europiane të vendit të tij”.
