Vendosni fjalën kyçe....

A po i vë gjobë Veliajt kritiku Arben Malaj?


Një përplasje me akuza dhe kundërakuza televizive ka nxjerrë së fundmi na pah një ngjarje të panjohur mirë për publikun.

Arben Malaj, eksponent i Partisë Sociale që aktualisht mban postin e anëtarit të Bordit Mbikëqyrës të Bankës së Shqipërisë ka thënë se në Bashkinë e Tiranës është rritur arroganca, duke mos i kursyer edhe akuzat më të rënda në disa medie, qeverisjen me gjoba.

Akuzat e Malajt, që shënjestrojnë kryebashkiakun Erion Veliaj:

“Është rritur arroganca e qeverisjes ndaj shqiptarëve. Rritja e arrogancës fillon nga Bashkia e Tiranës. Kam kundërshtuar moslejimin e shitësve në rrugë. Nuk po flas për qumështin, por si mund të sillesh me arrogancë për atë që nxjerr dy tufa presh, një arkë domate, disa qepë për të blerë një palë këpucë, për të dërguar djalin në shkollë apo për të shkuar diku.

Ne qeverisim me gjoba, jo me zemër. Dhe pastaj harxhon mijëra orë në TV duke mbjellë pemë për të përmirësuar imazhin. I gatshëm të përballem me Veliajn për këto çështje. Nuk kthehem në politikë nëpërmjet kësaj PS-je. PS e vërtetë janë njerëzit e thjeshtë, jo ato që vodhën pushtetin”

Një kritikë e fortë por që me siguri do të kishte kaluar pa u vënë shumë re nëse nuk do kishim rrëfimin që të merr vëmendjen të vetë kryebashkiakut Veliaj, pak kohë më pas.

Veliaj ka zgjedhur të kundërpërgjigjet, duke folur për një gjobvënie ndaj tij. Madje, sipas asaj që kryebashkiaku tregoi për “A2 CNN”, fjala është për një leje ndërtimi në Mjull-Bathore, që vëllai i Malajt kërkon.

Kundërakuza që Veliaj i bën Malajt në “A2 CNN'”:

 “…një gjë ia kam bërë të qartë edhe zotit Malaj, por edhe shumë të tjerëve, unë nuk pranoj gjoba…Ia kam bërë të qartë zotit Arben Malaj edhe zotit Basri Malaj, nuk marrin dot leje në Mjull-Bathore në tokë të gjelbër, në tokë ullishte, në tokë që nuk është truall, në tokë bujqësore ku nuk ndërtohet, duke më vënë gjoba në televizor… Më vjen keq që abuzon me rolin e tij në bordin e bankës duke u marrë tërë ditën me politikë kundër Kryetarit të Bashkisë. Të japë dorëheqjen, të kandidojë për kryetar bashkie, T’ia japë vetë lejen vëllait të vet por unë nuk kam ndërmend as të shkoj në burg, as nuk kam ndërmend të shkel ligjin”.

A po i vë kritiku Malaj gjoba Veliajt dhe nëse po pse Veliaj zgjodhi ta bëjë publik këtë informacion, vetëm pasi u sulmua nga Malaj publikisht? Apo është e kundërta, Veliaj është detyruar të bëjë publik detajet që zotëronte nga biseda e tyre pas shantazhit publik të ish-ministrit të Financave?

Ky është rasti i dytë i akuzave për gjobvënie ku përfshihet emri i Erion Veliajt. Muaj më parë një biznesmen nga Kosova, Ramiz Kelmendi akuzoi Veliajn për gjobvënie në vlerën e 7 milionë eurove, duke thënë se i kishte marrë 1.6 milionë euro për dokumentet dhe lejet e bashkisë. Veliaj reagoi pas akuzave të Kelmendit duke thënë se interesi publik dhe ai i qytetarëve mbizotëron mbi çdo projekt tjetër./Hashtag.al


Leave a Reply

Your email address will not be published. Required fields are marked *